Dia 31 di Augustus e prome fase di e proyecto Adopt an Alley a clausura cu un Poetry Night (Anochi di Poesia) organisa pa Basha Foundation Aruba den e bario di Rancho. E programa a consisti di declamacion di poesia, pintamento riba muraya, musica, y baile. Minister di Asunto Social, Hubentud y Labor Sr Paul Croes tabata presente specialmente pa por inaugura e borchi di Hanch’i Kalki cu e publico presente. Durante e presentacion Minister Croes a papia tocante Feria Social, cual a financia e prome fase di e proyecto Adopt an Alley. E anochi a wordo bon bishita y publico a haya oportunidad di admira e forno di kalki di paden despues cu esaki a wordo limpia. Youth Coach Ginelly Quandt y boluntarionan a duna e hanchi su debido atencion door di hacie limpi, dune un man di verf y haci mantencion. Por lesa mas tocante e hanchi riba e facebook page: Adopt an Alley
Dia 3 di September e grupo encarga cu e proyecto a presenta durante e evento di clausura di Feria Social na Fort Zoutman. Durante e anochi aki e boluntarionan y youth coach a ricibi un certificado y tabata tin e oportunidad di gana diferente premio. Mientras cu e team no a logra gana yun premio, Youth Coach Ginelly Quandt tabata un di e 4 nominadonan pa Best Youthcoach di 2016. Stichting Rancho ta sumamente contento cu e efecto positivo cu e proyecto a trece cu ne pa cu e hanchinan di Rancho. E proyecto a demostra con bo por cambia un hanchi den un area publico unda eventonan por wordo organisa. Awor cu e instalacion di e borchinan, Hanch’i Kalki ta mas visibel pa turistanan cu ta cana den e area.
Apesar cu Hanch’i Kalki ta wordo afecta pa diferente problema, pa un anochi e hanchi a briya y a mustra su potencial. Stichting Rancho kier gradici Feria Social y tur instancianan cu a contribui na e proyecto. Un danki na e publico cu a bin presencia e transformacion di e hanchi durante Poetry Night dia 31 di Augustus. Un danki special ta bay na nos Youth Coach Ginelly Quandt y e boluntarionan cu a duna di nan curason pa asina e proyecto tabata un exito. E boluntarionan di e proyecto ta: Ginelly Quandt (Youth Coach), Vanessa Moise, Ysraella Maduro, Zu-Kain Todd, Zu-Jean Todd, Nickylla Bergrok.
Fuente: www.stichtingrancho.org