Internacional: Miles di Venezolano a subi cayanan di Caracas dialuna pa protesta contra e reeleccion di presidente Nicolas Maduro despues cu el a wordo proclama ganador di e eleccionnan den oranan di mainta, un resultado desconoci pa oposicion y varios pais den e region.
Mientras cu e protestanan a tuma luga den e cayanan di Caracas, e lider di oposicion Maria Corina Machado a presenta meimei di atardi banda di e candidato Edmundo Gonzalez pa ratifica su posicion for di e anochi anterior: pa ignora e anuncio di autoridad electoral tocante e victoria di Maduro y pa insisti riba esei Gonzalez ta e presidente eligi.
Machado a sigura cu nan tin un manera pa “prueba e berdad” di e victoria di oposicion den e eleccionnan presidencial y a yama su siguidornan pa un manifestacion den e capital pa “demostra e forsa y mayoria cu nos ta.” Anochi, el a indica, nan lo divulga e pruebanan publicamente.
“Nos tin 73.20% di e procesverbaalnan y, cu e resultado aki, nos presidente eligi ta Edmundo González Urrutia,” Machado a bisa, indicando cu ni sikiera e presidente Venezolano a obtene 100% di e votonan for di e procesverbaalnan cu e no por a verifica e oposicion lo ta suficiente pa surpasa Gonzalez.
Di su banda, e candidato di oposicion a pidi “trankilidad y firmesa” den e rechaso di e resultadonan di eleccion y a gradici comunidad internacional pa su exigencianan di transparencia na e gobierno di Maduro.