BUENAVENTURA, Colombia – E protestanan den e ciudad Colombiano di Buenaventura, cu ya ta completa un siman, a genera e retencion di 229.489 ton di carga, ademas di 24.465 container den e cinco terminalnan portuario, di acuerdo cu estadisticanan di e Superintendencia di Puerto y Transporte.
Ante e situacion, e Gobierno di Presidente Juan Manuel Santos, a manda un comision na e luga pa dialoga cu e protestantenan y logra un consensus.
“Nos ta spera cu e dialogonan di awe y mañan, conduci na nos pa haya un solucion na e problematica aki. E Gobierno, manera cu a wordo bisa, ta bin cu un disposicion absoluto pa scucha, dialoga y pa construi solucion na e problemanan cu awe Buenaventura ta enfrenta,” e vice minister di Interior, Guillermo Rivera, a bisa, segun Reuters.
E paro ta afectando ambos parti, tal y manera cu e presidente ehecutivo di Camara di Comercio di Buenaventura, Alexander Micolta, a bisa, kende a calcula cu tanto e puerto como e negoshinan rond di dje, ta perdiendo miyones di dollar.
E habitantenan di e ciudad portuario aki di Colombia, ta exigi e Gobierno un miho servicio den e suministro di awa potabel, salud y educacion. E protesta a genera sakeo na supermercadonan y blokkeo di e vianan, durante e fin di siman aki
E administracion Santos ta enfrenta otro paro na nivel nacional manera ta e caso di e maestronan di scol y universidadnan publico.
Fuente: www.ntn24.com