Minister di Husticia, mr. Andin Bikker, ta elabora rib’e preocupacion cu tin en cuanto botonan ilegal cu ta subiendo nos beachnan semanalmente y e falta di control y tecnologia necesario pa atende cu e situacion aki na nos costanan debidamente.
E Minister ta wardando riba conseho di un comision special institui na Cuerpo di Polis cu a haya diferente presentacion di radarnan y cu nan lo mester recomenda e Minister riba cua ta e miho pa uza y asina e por tuma un decision p’asina por haya e radar dentro di algun luna. A reuni tambe pa loke ta trata e proceso di busca un helicopter.
Segun Minister Bikker, tambe ta wardando riba e fabricantenan di botonan sofistica pa nan traha riba esunnan di Aruba. E botonan aki a ser presenta na Corsou, caminda e Minister tabata algun siman pasa pa presencia esaki. E botonan di Corsou tabatin algun fayo cu mester a ser drecha y a pidi pa nan traha suficiente riba esunnan di Aruba pa evita e mesun fayonan. Esaki ta haci cu e entrega di e botonan pa Aruba lo por tarda algun siman.
Ademas, Minister Bikker ta splica cu ta trahando riba e parti di reforsa e diferente cuerponan. E Minister a haya un concepto di un samenwerkings protocol entre e cuerponan pa mehora e cooperacion. E parti di migracion tambe ta bay tin un dimension nobo cu ta bay tin e tarea di sigura y vigila nos costanan, entradanan na aeropuerto y e facilidadnan unda e barconan ta yega. Ta trahando riba e factor aki pa e por ta un dimension unda cu por haya acceso na data bases internacional p’asina por haya informacion riba tur persona cu ta presenta na frontera.
Minister Bikker ta mustra cu e deseonan pa haci mas semper ta hopi, pero e fondonan pa realisa esaki ta limita. Esaki no ta descarta e atencion y esfuerso cu ta haciendo actualmente, cual e Minister ta sigura cu pueblo lo cuminsa mira resultado lihe.