Mirando cu tin hopi keho di e bario y Aruba, pa loke ta e situacion na e dump den bario di Simeon Antonio, gerencia di Serlimar a cuminsa busca solucion pa cuminsa wak den ki direccion lo bay. Lionel Croes, vocero di Serlimar a splica cu e situacion a keda mesun cos. Ta trahando duro pa minimalisa esaki, pero naturalmente no por tin control, mirando cu den superficie cu e candela cu tin abao di e sero, por sali un ora pa otro. A constata cu na varios ocasion, tin hendenan no autorisa, cu ta subi tereno di Parkietenbos, pa haci nan trabaonan y pa por saca desperdicio, pa nan por traha placa. Of hendenan tin biaha cu ta pidi cooperacion di autoridad pa prohibi nan pa subi tereno. Toch di un manera of otro nan ta haya e manera pa subi tereno, sin autorisacion y despues tambe cu ora hala nan atencion, hopi biaha nan ta rebeldia y ta pone bida na peliger y menasa trahadonan di Serlimar y hasta menasa a cay cu lo sende candela cual cu a pasa na mas cu un ocasion.
E problematica di dump aki ta un problema cu a bin pa algun aña caba y mirando cu Gobierno tambe a dicidi pa traha riba e planta, caminda cu Serlimar a haci un limpieso y a reuni cu algun experto pa mira kico por haci pa suavisa e situacion. Sinembargo e planta no ta rekeri of no ta compatibel pa loke Gobierno kier haci. Loke Gobierno kier haci pa Parkietenbos, no ta conoci. No tin un plan concreto. Di parti di Serlimar si a cuminsa sondea e otro oportunidad of opcionnan cu tin riba mesa. Gerencia ta trahando duro riba e parti aki y tin negociacion y combersacionnan andando cu personanan of inversionistanan internacional, pa wak den un termino corto, pa mira kico lo por ta un posibel solucion. A papia di incinerator.
Tabata tin un reunion basta fructiro cu nan consultant, caminda cu ta buscando toch pa e parti di “medical waste” y tambe desperdicio di bestianan morto, pa por tin un incinerator mas chikito, cu por yuda esaki, Croes a splica.
Solucion no tin ainda riba mesa kico lo bay haci, pero si tin cu busca uno pasonts keto bay dumpnan ilegal ta birando algo serio na Aruba, sigun Croes. E ta un situacion basta alarmante, no pa e bario di Parkietenbos cu pa añanan largo ta sufriendo. Pero pa otro barionan tambe sa cu tin dumpnan ilegal y cu algun siman atras tambe por a nota cu tabata tin candela cu a surgi na Jaburibari y cu a afecta e parti turistico, hotelnan a keha, y cu e biento a bolter. Ta un situacion cu nan a sinti por ta un of dos biaha den un aña. Pero Parkietenbos, nan ta sufriendo esaki dia aden, dia afo. Awor aki Serlimar ta man mara. Nan kier un solucion y ta pidi Gobierno tambe pa actua den un forma mas prudente, un forma mas responsabel y no por keda desvia mas di e topico aki, pasobra ta bira un topico cu ta papiando dia aden y dia afo riba dje. Pero un solucion no tin. Esey ta lamentabel.
Segun Croes tin di compronde, Gobierno a negosha of a bin cu e posibilidad, caminda cu e desperdicionan por wordo empaketa y manda pa Colombia cu nan por cumpra esaki. Tur esakinan ta den proceso. Di parti di Serlimar, no ta na altura mas di e parti aki kico ta negociacionnan cu Gobierno. Sinembargo, den nan reunionnan si, sa cu director interino, sr. Robert, ta bezig cu algun negociacion y ta spera cu nan mes por di nan banda, pa wak pa bin cu un posibel solucion alternativo y pa presenta esaki finalmente na Gobierno y pa wak si e ta algo cu ta cay den nan plan di maneho.
E tereno di Parkietenbos ta chikito y hopi halto. No tin mas luga. Mester un otro localidad, un otro tereno of mester cuminsa pa procesa, pa cuminsa cleanup separa e santo, for di e desperdicio y cuminsa desmantela esakinan y pa tapa buraco y baha e sero cu tin pa sigui e procesamento na Parkietenbos.