Ley di Cacho ta un Politieverordening, pero segun Veterinario Irene Croes, algo cu nan sigur kier introduci pronto, cual ta den e plan nacional pa alivia problematica di cacho riba caya ta un Task Force special pa atende cu esaki pasobra Polis su mannan ta yen caba. “Esey ta e proximo paso pa nos. Nos ta bezig ta logrando esaki poco poco”, sra. Croes ta bisa. Tin hopi otro manera cu bo por yega na implementa e Ley di Cacho manera cu e ta, cu ayudo kisas di City Inspector of otro. “E idea ta pa nos lanta un Dog Control Unit. E unidad aki lo bay yuda piki cachonan cu ta riba caya. Por ehempel un djis si tin prohibicion di cachonan riba beach, e ora lo mester un unidad asina pa por piki cachonan pa bin cu nan akinan na e Centro di Control di Cacho”, sra. Croes ta agrega.
Tin hopi doño di mascota cu ta para responsabel pa nan bestianan y e situacion ta hopi mas miho den comparacion cu algun aña atras, pero tog ainda tin casonan unda doño di mascota ta dicidi di dual nan cachonan unda cu ta, por ehempel den bario di Brasil esaki ta pasando hopi pa basta tempo.
“Mi ta prefera cu enbes di bo dual e cachonan den bario, pa trece nan akinan na Centro di Control di Cacho”, Veterinario Irene Croes ta bisa.
Conscientisacion ta keda importante: Concurso di Pinta y Kleur 2020
Riba Dia di Bestia 4 October 2020, Veterinario Irene Croes a invita miembronan di prensa den cuadro cu e revelacion di Concurso di Pinta y Kleur. Aña pasa e concurso cu nan a organisa a haya un bon acogida cerca e muchanan di Basis School unda nan a haya 419 pintura. A dicidi di ripiti e concurso e aña aki haciendo e di edad di 4 pa 8 aña pa muchanan di Kleuter School tambe por participa. E meta sigur ta pa henter comunidad ta envolvi den esaki pa trece mas conscientisacion cual ta keda e meta di e plan nacional di atende cu problematica di cacho riba caya akinan na Aruba.
https://www.facebook.com/masnoticia/videos/3310217052428774
Na Centro di Control di Cacho, ora trece bestianan akinan, e personanan cu ta encarga na e luga por mira den nan netwerk di comunicacion cu otro fundacion por wak si por haya un hogar nobo pa nan. Varios cacho cu a yega akinan a wordo adopta of haya un otro oportunidad na un otro fundacion pa duna nan un tiki mas dia di bida pa haya un cas nobo, otronan ta riba lista pa wordo exporta pa Merca of Hulanda pa un hogar nobo.