Pronto lo cuminsa cu proyecto piloto di ‘Intervencion Trempan” bou di centronan di cuido di mucha na Aruba

Sociaal Crisis Plan (SCP) actualmente tin un total di 20 socio activo den e sectornan; social, hudicial, enseñansa y salud. Cada un ta trahando riba e proyectonan den cuadro di prevencion, curacion, represion y tambe cu enfoke riba nos muchanan special. Tur e 31 proyectonan activo tin un solo meta y esaki ta; pa contribui na e desaroyo, siguridad y e bienestar di nos mucha- y hobennan.

Fundacion pa nos muchanan cu informe:

Posted by MasNoticia.com on Friday, July 17, 2020

Un di e proyectonan cu ta cay bou di auspicio di Sociaal Crisis Plan (SCP) ta e proyecto PEP (Proyecto Pre-Escolar), cu tin e meta pa garantisa y salvaguardia e calidad di cuido y educacion di nos muchanan entre 0 – 4 aña. Den cuadro di ultimo desaroyo lo bay cuminsa cu un proyecto piloto den colaboracion cu Fundacion Pa Nos Muchanan (FPNM) y Fundacion Autismo Aruba (FAA) cu lo wordo ehecuta door di Anouk Eman. Caminda a base di un encuesta bou di 121 centro di cuido di mucha, lo defini cantidad di participacion na e proyecto.

E meta di e proyecto piloto aki ta pa crea suficiente conocimento den e centronan di cuido pa por tin deteccion y intervencion trempan pa e muchanan cu cualkier necesidad special. E funcion di Intervencion Trempan ta pa brinda tur mucha un oportunidad igual, pa asina por atende un tipo di scol regular y ta un miembro di nos comunidad independiente. Actualmente na Aruba no tin un database nacional di e muchanan cu autismo y tampoco e guia asina trempan pa e muchanan cu necesidad special.

Cuminsando desde 27 di juli 2020 lo bishita tur centro di cuido pa haci un encuesta cu ta parti di e proyecto piloto aki. Cu e autorisacion di mayor, lo cuminsa haci “screening” na augustus 2020 pa por detecta si un mucha mester di un ayudo adicional den cierto area cu ta contribui na su desaroyo. E “screening” aki lo duna e centro di cuido e oportunidad tambe pa yuda e muchanan na un edad trempan y alabes haya sa mas di cada mucha nan habilidadnan. E resultado di e screening lo indica e parti debil di un mucha, cual ta importante pa e avance educativo di e muchanan den e spectrum di autismo y e muchanan cu otro desabilidad. Finalmente, e proyecto piloto lo crea tambe un manual/protocol pa guia e centronan di cuido, curso y anochi informativo pa e lidernan y e mayornan como tambe terapia personal.

Pa mas informacion di e proyecto aki por tuma contacto cu Sue-Ann Laclé Ras (sueann.ras@gobierno.aw) cu ta coordinador nacional di implementacion di Ley Kinderopvang. Pa mas informacion di Sociaal Crisis Plan (SCP) por bishita www.scparuba.com, Facebook @scparuba of por yama 5281189.

Comments

comments