Hopi hobennan cu a caba di studia na Hulanda, a traha un tempo, y awor lo bini bek Aruba, unda cu mester corda cu nan tin tempo ta biba nan so caba y lo kier bini pa tin nan mesun cas riba nan isla.
A puntra DIP con lihe nan lo por traha pa e tipo di grupo di hobennan aki cu kier regresa nan pais bek y haya un tereno. Haime Croes, director di DIP ta informa cu casualmente e siman aki DIP a tuma un proyecto netamente pa e grupo aki. Esaki lo wordo anuncia pronto cual ta hopi inovativo, “pero esaki lo bay halto [den construccion], na un forma hopi inovativo, y hopi di nan tin suficiente fortalesa pa por cumpra un cas, nan tabata bibando afo y nunca tabata tin un cas. Esaki tambe ta pas cu e beleid di loke cu nos kier”, segun sr. Croes. Ta spera cu entrante simannan venidero lo por mira e proyectonan aki.
Locual ta hopi importante pa tuma nota di dje segun DIP, ta cu nos terenonan ta schaars.
A base di ROP, a midi y geef aan caba luganan unda cu tin tereno, entre otro San Nicolas, ta bezig eynan tambe cu henter un otro proyecto riba kico lo bini pa San Nicolas den aspecto di viviendo. Eynan tin mayoria di tereno, y hopi biaha ta referi na San Nicolas pa tereno. Pero segun sr. Croes, “nos tur ta custumbra di biba pabao di brug, kiermen tin hopi hende cu mester tereno y nos ta bisa nan check San Nicolas y nan ta bisa no. Aworakinan cu e hotel cu ta den pipeline pa bini pariba, nos ta kere cu nos por sigur encamina pa e proximo temponan aki e desaroyo di plan di pariba di brug”, segun sr. Croes