Segun Parlamentario Jennifer Arends-Reyes un di e proyectonan di mas grandi pero alabes sumamente necesario pa Aruba como pais ta e Green corridor. E ta un proyecto cu den mas cu 60 aña no tabatin algo similar asina pa Aruba. Si nos sa cu nos ta biba ariba un isla cu tin un dependencia asina grandi ariba Turismo, nos no por keda progresa na un area so caminda turistanan ta concentra y lubida ariba e isla completo hunto cu su ciudadanonan. Ta yega un cierto momento cu e infrastructura mester conoce un ‘upgrade’. E conexion di Oranjestad pa San Nicolas semper a keda un drempel pa conoce un fluho real di trafico y pa sigui promove locual San Nicolas tin di ofrece tanto di naturalesa como herencia cultural tanto na nos bishitantenan como localnan. Hopi paisnan Caribense a conoce inversionnan grandi pa cu nan infrastructura pa asina no conoce un contraste grandi entre e parti desaroya y e parti caminda nos localnan ta biba. Un pais den desaroyo tin su retonan, retonan pa planea pa futuro y con ta mira Aruba como isla pa por acomoda tur e trafico y fluho di hende cu awendia a yega riba 100 mil habitante. 60 aña pasa nos infrastructura por a carga tur e trafico y habitantenan di antes pero awendia e infrastructura actual no ta apto mas pa e desaroyo cu nos isla a conoce. Tur capital na paisnan grandi ta constantmente den construccion, e ta trece su molester sigur cu ne pero e opcion pa keda sin haci nada y laga tur cos mescos tambe lo ta algo cu solamente atras e lo keda bay y sigui costa mas den e parti di mantenimento. Den e construccionan actual di PPP e parti di mantenimento ta inclui den e prijs cu ta paga y mester percura pa Aruba ricibi e miho calidad di construccion y producto pa nos pais y conciudadanonan. Recientemente fraccion di AVP a hasi un bishita na e trabounan di Green Corridor y a pone hopi enfasis ariba e parti di calidad y cumplimento di e proyecto na tempo pa reduci cualkier molester cu lo por tin durante e fase di construccion. Fraccion a haya splicacion amplio di e trabounan, e planning y retonan cu a encontra. Pronto Aruba lo por mira back riba un proyecto grandi cu a ser realisa na beneficio di Aruba henter sra Arends-Reyes ta termina bisando.