Prome tayer di e proyecto piloto di e-Government presenta na Diferente Departamento di Gobierno di Aruba y Stakeholdernan

Un tayer virtual cu diferente Departamento di Gobierno di Aruba y stakeholdernan a tuma lugar diahuebs, 29 di April 2021 cual ta forma parti di e proyecto piloto den e proceso di e-Government. E proyecto piloto di e interoperability platform yama Conexion ta wordo guia door di Cybernetica, un compania di Estonia. Cybernetica lo implementa e plataforma di interoperabilidad pa pais Aruba. Cybernetica a traha e plataforma exitoso pa Gobierno di Estonia.

e-Government ta mas cu un plan strategico di Gobierno di Aruba, e ta un cambio esencial den nos manera di traha y un cambio crucial den nos manera di pensa. E cambionan cu ta biniendo ta indispensabel pa un miho maneho di Gobierno di Aruba. e-Government lo trece beneficionan grandi no solamente pa e departamentonan di Gobierno pero tambe na nos comunidad, sector priva, y ta un pilar central den nos masterplan di recuperacion y resiliencia ‘Reposicionando e Rumbo di Nos Pais’, e ta e comienso di un transformacion total di Gobierno.

Yuri Feliciano, Pilot Project Manager y consehero di maneho di IT di Minister di Turismo, Salubridad y Deporte, a yama tur participante bon bini y a informa cu Cybernetica lo splica kico ta e plan den e proyecto piloto y cu den transcurso di otro siman lo tin diferente service workshop specificamente pa e parti tecnico.

E proyecto tin 3 meta principal:
Intercambia data na un manera sigur
Test y implementa servicionan digital
Facilita entrenamento na trahadornan publico

Diferente preguntanan a bini dilanti durante e sesion aki cu a dura mas o menos 3 ora. Algun pregunta cu a bini dilanti y cu a wordo discuti tabata entre otro:
Con e proceso di e-Government a ser ehecuta na Estonia y kico a siña di esaki?
Con Estonia a prepara e ciudadanonan pa usa e sistema?
Con Estonia a haci pa educa e poblacion pa usa tecnologia digital pa haya acceso na servicionan di e-Government?

Hopi di e preguntanan aki tambe tin contesta den e plan di maneho y vision di Gobierno di Aruba cu ta carga e nomber, Aruba eGovernment Road Map, Building A Better Citizen Experience 2020-2025 cu a wordo publica na fin di 2020 pa Ministerio di Asuntonan General.

E tayer tabata uno hopi informativo y cu un audiencia di 50 persona di Departamentonan di Gobierno y stakeholdernan den e programa piloto. Lo tin mas sesion den futuro unda cu mas stakeholder di sector publico y sector priva por haya e oportunidad pa participa. E trayecto di e-Government ta un proceso riba termino largo cu lo encapara comunidad henter.

Experencia di Estonia ta cu cada biaha cu tin un servicio nobo semper tin expectativanan halto entre e populacion. Ta importante pa nota cu comienso di e-Government na mayoria pais rond di mundo ta tuma su debido tempo (pasonan chikito y firme) pero ta algo sigur y determinante.

“Implementacion inicial di e-Government lo ta den e secuencia di instala e plataforma, diseña e servicionan y entrena trahadornan, y asina hopi paso mas lo sigi den e proximo 5 pa 10 añanan pa sigura cu e ciudadano por disfruta di tur e beneficionan cu digitalisacion incluso ta ofrece na un manera sigur” – Minister President, Evelyn-Wever Croes

Den e proximo simannan lo tin mas informacion con e proyecto di e-Government ta progresando.

 

Comments

comments