Portugal y Mexico a logra diasabra nan cupo pa e semifinalnan di e Copa Confederaciones den logra prome y di dos luga di e grupo respectivamente. E “Portuguesnan a supera New Zealand 4-0 y a keda cu e liderato mientras cu “el Tri” a vence e anfitrion Rusia 2-1 eliminando nan for di e certamen.
E campeon di Europa a hunga contra e mas debil di e grupo y cu un empate a logra e clasificacion. Sin embargo, Cristiano Ronaldo y su team, a vence e resistencia di New Zealand cu a soporta solamente 20 minuut y despues a mira con su porteria a cay venci den cuater oportunidad.
Ronaldo, eligi miho hungado di e partido pa di tres ocasion consecutivo, a habri e scoreboard di penal poco despues di mey ora di wega y prome cu e descanso, a sentencia Bernardo Silva (37). Ya den e di dos parti, a completa e goleada Andre Silva (80) y Nani (90+1).
E unico noticianan negativo pa e Portuguesnan tabata e lesion di Bernardo Silva, kende a ricibi un golpi na su enkel tras di a marca y a wordo substitui y e carchi geel cu e centralista Pepe a haya cu ta impidi’e pa hunga den e semifinal, AFP a splica.
E otro encuentro di e grupo tabata mas preta ya cu esun cu gana, lo logra e clasificacion y lo a laga e otro elimina.
Rusia a habri e scoreboard por medio di Alexander Samedov den e di 25 minuut y a duna speranca na e aficcion, pero Nestro Araujo (30) y Hirving Lozano (52) – eligi miho hungado di e partido, ambos di cabes a firma e remontada Mexicano.
Tras e resultadonan aki, Portugal a caba cu 7 punto, mescos cu Mexico, pero e Europeonan ta lidera e yabi, danki na e diferencianan di gol.
Di e manera aki, e Seleccion “Luso” lo hunga e pase pa final diaranson na Kazan, contra e di dos di e yabi B, cu lo keda resolvi diadomingo, aunke tur cos ta apunta cu e lo ta Alemania of Chile. Mexico lo haci’e un dia despues, na e mesun ora, na Sochi.
Fuente: www.ntn24.com