Den Ministerraad diabierna mainta tabata tin un reunion unda Prome Minister Evelyn Wever Croes tambe tabata presente y a comenta cu e Minister di Asuntonan social Sr. Glenbert Croes tin algun siman trahando riba e problemanan social di Aruba. Manera tur hende sa nos a keda sacudi pa e morto cruel di e dos angelitonan y desde e momento ey e enfasis a cambia na Aruba. Tabata tin hende ta pensa cu problema social no ta importante y ta solamente traha caya bunita, brug awor aki tur hende na Aruba ta di acuerdo cu problemanan social mester wordo atendi.
Prome Minister Wever Croes a sigui bisa cu Minister Glenbert Croes hunto cu full un team grandi di departamentonan cu ta resorta bou di e Ministerio di asuntonan social y tin par di dia ta cera cabes hunto y dia 5 di December 2017 a presenta un plan di emergencia un ‘ Crisis Plan ‘. Dies punto e departamentonan a bin cune pa Ministerraad tuma decision y nos a tuma e decisionnan, y basicamente a tuma e momento ey a eleva e tematica di problemanan social na e nivel nacional pasobra ta un explocion social nos tin y nos a pone bou di e Minister President.
Minister Wever Croes a sigui bisa esaki ta pa mustra cu ya e no ta problema mas pero ta un asunto di tema nacional tur Minster ta encarga cune y awe Minister Glenbert Croes a bin cu e prome plan di ehecucion, e prome ta e medidanan di emergencia ken a bay tuma cua decision y kico cada departamento tin mester pa nan funcional optimalmente y esaki no ta e prome ni ultimo y nos tur den e Ministeraad a bay di acuerdo cu e plan cu a keda presenta.
Awor aki e Ministernan lo mira con lo bay cumpli cu esaki financieramente cu e contenido di e plan y esei ta un decision sumamente importante awe cu nos a tuma y cu esaki nos kier mustra e sosten na tur esnan cu ta traha den e area social cu a traha duro riba e plan aki y presenta cuanto e gastonan ta. Esaki no ta prome biaha cu nan a hacie den pasado a keda haci tambe pero ora a presenta e gastonan gobierno anterior a spanta y pone esaki pone den lachi y prefera di usa e cen pa embeyece, cu klinker y mas.
Awe nos a marca e diferencia asina prome Minister Sra. Evekyn Wever Croes a bisa, awe nos a mustra cu e ser humano ta central y e gastonan envolvi cu e plan aki ta enormamente halto y sinembargo nos a bisa cu nos ta pone ser humano central y nos ta percura pa e placa aki bin riba mesa. Asina Prome Minister Evelyn Wever Croes a finalisa.
FIN.