Diaranson atardi, Prome Minister Evelyn Wever-Croes a presenta na Parlamento pa duna informacion riba e desaroyonan recien na nos pais bisiña Venezuela. Hunto cu Prome Minister pa duna informacion, tawata presente e expertonan riba diferente tereno cu ta atendiendo e tema aki entre otro, Minister di Husticia mr. Andin Bikker, Cuerpo Policial, Kustwacht, Siguridad Nacional, Dimas, Imigracion Aruba, Rampen Bureau, Marina Real y Taskforce Mensenhandel/Mensensmokkel.
Prome Minister a informa cu no a bin mucho cos nobo ta desaroyando rond di e situacion aki. Gobierno di Aruba y tur e autoridadnan concerni ta sigui e situacion na Venezuela di cerca, pa asina nos ta alerta y prepara pa cualkier eventualidad pa proteha nos pais.
Gabinete Wever-Croes ta reuni cu autoridadnan local riba e topico aki tur dia, y Prome Minister a indica cu e mes ta atende reunionnan algun biaha pa dia.
Premier Wever-Croes a informa tocante un desaroyo nobo di e siman aki cu ta e anuncio di e posicion di Reino. den un carta cu Minister di Relacionnan Exterior Hulandes señor Stef Blok a manda pa Parlamento Hulandes, a indica cu Hulanda ta reconoce señor Juan Guaido como e Presidente Interino di Venezuela pa e periodo cu e tin mester pa organisa eleccionnan liber na Venezuela. Den e carta aki, Hulanda ta splica su punto di bisti y e posicion di Reino, lo mantene e relacion diplomatico cu e regimen di Presidente Nicolas Maduro cu tin e autoridad real mientras tambe lo cuminsa cera contactonan diplomatico cu e esunnan di Juan Guaido.
Prome Minister e enfatisa cu Gobierno y tur e expertonan concerni ta sigui e desaroyonan di cerca tur dia y tur e instancianan aki pa hopi tempo caba a bin ta prepara riba e tema aki pa asina wordo informa a base di informacion veridico y pa tuma accion riba informacionnan veridico y no riba informacionnan cu no ta corecto.
Aparte di esaki, segun Prome Minister, hunto cu Marina Real, autoridadnan local tanto maritimo como riba tera y cu cooperacion estrecho cu Corsou y Boneiro ta atende cu e tema aki debidamente y asina duna informacion tambe.
Prome Minister Evelyn Wever-Croes: “Nos pais bisiña, Venezuela ta pasando momentonan transcendental. Mi ta sinti tambe un preocupacion den comunidad. Y no ta sin motibo si nos mira tur e mensahenan cu ta wordo pasa rond. Mi ta haci un apelacion na tur hende na Aruba pa keda trankil, pa nos no recuri den panico. Pa asina den trankilidad tuma e decisionnan den interes di nos pais Aruba. Aparte di esey loke nos cada un por haci, ta uni den oracion pa Venezuela. Ohala por bin un resolucion pronto”.