Pa Prome Minister di Aruba Sra. Evelyn Wever-Croes, nos grandinan den nos comunidad tin un prioridad grandi den su vision di gobernacion. Pa mesun motibo aki tambe e no a duda pa acepta un invitacion asina special di Huize Maristella pa honra e peticion pa cende e luznan di Pasco pa asina duna inicio na celebracion di comienso di temporada di Pasco pa nos grandinan di Huize Maristella. Hunto cu Sr. Marcolino Dijkhof nos Prome Minister a cende e luznan na Plaza Ambiente na Maristella hunto den presencia di nos grandinan cu ta habita den e cas di cuido.
Den su discurso dirigi na nos grandinan y na tur esunnan presente, Prome Minister a elogia cu hopi emocion e personal completo di Huize Maristella pa e bunita decoracion y e hardin espacioso dunando nos grandinan e libertad pa cana y sinta pa disfruta di e aire fresco. “Ta hopi di admira cu tur esunnan cu a traha pa haci esaki posibel a traha cu alma y curason mesun manera cu nan ta cuida nos grandinan tambe”, e Prome Minister a bisa.
Prome Minister a laga un mensahe hopi bunita atras pa nos grandinan pa e temporada mas bunita di aña na unda nos ta celebra nacemento di Niño Hesus. Y a desea cu e temporada yena tur nos grandinan y nan famia cu paz, harmonia y hopi amor. Y a pidi tambe bendicion di Dios riba cada un.
“Nos pais tin mester di hopi amor y hopi oracion. Y hunto nos lo hiba nos pais padilanti. Nos grandinan tin un luga hopi special ora nos ta papia di e vision di gobierno y den mi curason. Nos kier pa nos grandinan sinti nan bon. Pasobra ta e trabou duro di nos grandinan a lanta e pais aki pa nos tur por gosa di dje. Y cu hopi orguyo nos lo sigui ehempel di nos grandinan, e fundadonan di nos Aruba”, tabata palabranan di Prome Minister Evelyn Wever-Croes.