E siman aki a tuma luga encuentronan di introduccion entre varios sector di nos comunidad y Prome Minister pa loke ta trata cultura, entre otro. E encuentronan aki a tuma luga na sede di MFA na Paradera y por bisa cu tur a cana den un manera positivo. Minister Eman ta reafirmando e sosten di Gobierno di Aruba cerca cada grupo, cada un importante pa nos sociedad.
Esey sigur ta e caso cu Stichting Maneho di Aruba su Carnaval (SMAC) ya cu Premier Eman ta consciente cu “Carnaval ta un parti importante di nos cultura caminda hopi di nos talento artistico ta wordo desplega.” Gobierno ta financia e celebracion hunto cu otro organisacion manera ATA y Setar, ademas di e coordinacion di departamentonan publico manera Polis, Ambulans, DTI, etc. Ta importante pa cada partido haya su luga den un ambiente positivo. Premier Eman a inclui gruponan di Carnaval y boluntarionan den esaki tambe.
Na su salida for di encuentro cu Prome Minister Eman, Shannon Henriquez, President di SMAC a splica cu a papia entre otro riba permiso general pa organisa actividadnan di Carnaval y a pasa over di cambionan den schedule y rutanan. Su persona tambe ta di opinion cu ta hopi importante pa conta cu apoyo di Gobierno di Aruba pa Carnaval por ta exitoso. Eman a expresa cu diferente peticion a bin dilanti y pa trata tur cos, a bay di acuerdo pa reuni regularmente. “Actitud di scucha y dialogo pa bay den un mayor harmonia.”
Otro reunion tabata esun cu un grupo grandi di Taxista. Blanca Orman, a fungi como vocero indicando cu nan peticion principal aworaki na Gobierno ta pa hala aden dos Decreto Ministerial cu nan no ta di acuerdo cu nan. E grupo cu ta para tras di e ponencia aki ta pasa e cantidad di 300 taxista y tur a firma un manifiesto cu a keda entrega na Prome Minister Mike Eman.
E mandatario di su banda a indica cu lo bay pasa riba tur informacion, pa despues den combersacion cu Minister de Meza tuma un decision, ya cu e ultimo aki ta e titular di Transporte y Turismo. Premier Eman a reuni cu e taxistanan cu autorisacion di su colega ya cu ta un situacion cu ta conta cu su preocupacion y ta kere firmemente cu pa tur cos tin solucion, pero ta depende con bo ta sinta dialoga cu e partnernan den sociedad.
Por ultimo, pero no menos importante, Minister President Mike Eman a reuni cu Harry Croes, kende ta e organisador di Festival di Dande. Den su di 43 edicion, e evento aki ta bay tuma luga dia 28 di December riba Plaza Betico Croes. Despues di e encuentro, Croes a expresa cu e ta contento di por a sinta cu Gobierno asina tempran y cu e cooperacion financiero y humano ta yuda pa por haci e festival liber pa un y tur por asisti por nada. “Un bon reunion caminda Minister a duna tur su sosten y awo nos ta bay prepara,” Harry Croes a bisa. Premier Eman a duna palabra na Sr. Harry Croes cu e por conta cu apoyo total di Gobierno. “Nos ta sostene cu gran placer.”