Dialuna dia 28 di april, Prome Minister di Aruba, mr. Mike Eman, a tene un reunion importante cu presidente di Organisacion di Pensionado Publico Arubano (OPPA), sr. Ivo Valdes. Durante e encuentro, Prome Minister a comparti e grato noticia cu entrante 30 di april, mas di 19.000 pensionado di AOV (Algemene Ouderdomsverzekering of AOV) lo mira un aumento efectivo di 250 florin riba nan entrada mensual, den forma di reparatietoeslag. E aumento aki ta representa un cambio substancial despues di hopi aña.
Ademas, mas cu 2000 persona cu tin pension di vuida y huerfano, pues e Algemene Weduwen- en Wezenverzekering (AWW) tambe lo haya e aumento aki tur luna. OPPA, representando un grupo grandi di nos comunidad, a indica na varios ocasion cu hopi pensionado ta lucha pa cubri necesidadnan basico tur luna. Gabinete AVP-Futuro, reconociendo esaki, ta compromete pa sigui sondea maneranan pa amplia y fortalece e sosten financiero pa esnan cu tin solamente un pension.
Mike Eman a enfatisa cu e intencion original di gobierno tabata pa duna e prome fase di aumento, e suma di 400 florin, pero e cambio repentino den maneho fiscal di gobierno anterior a limita e posibilidad pa haci esaki manera tabata kier. Prome Minister a sigura cu Gobierno lo sigui traha pa logra e meta di 750 florin di aumento na reparatietoeslag.
Banda di e aumento financiero, Prome Minister Eman a informa Ivo Valdes cu Minister di Salud Publico, drs. Mervin Wyatt Ras, ta trahando riba un plan pa amplia e lista di remedi cu ta cubri pa tur hende, cu e meta pa elimina pago adicional pa remedi, cual lo beneficia e pensionadonan y comunidad en general.
Segun Presidente di OPPA, ta pa e prome biaha durante su liderazgo cu gobierno a invita OPPA formalmente pa sinta na mesa pa discuti plan- y documentonan entrega na formadornan. Segun Valdes, esaki ta un paso positivo y un motibo di speransa, señalando un cambio di manera di traha: un gobierno cu ta inclui e pensionadonan den nan plan di gobernacion.
E prome pago di e aumento di 250 florin na reparatietoeslag ta tuma luga e siman aki, un promesa concreto y cu ta cumpliendo cu ne relativamente lihe. Valdes a compara e 250 florin actual cu e 30 florin cu a ricibi for di gobierno anterior, y ta optimista cu Gobierno AVP-Futuro lo cumpli cu e meta di un aumento total di 750 florin pa pensionadonan.
Gobierno ta cuminsa un caminda di restauracion di dignidad y siguridad pa nos pensionadonan, mirando cu gratitud atras riba tur e trabao y sacrificio cu nan a haci pa Aruba.
