OTTAWA, Canada – Canada ta e di dos pais na mundo pa legalisa e cultivo, benta y consumo di marihuana.
Prome Minister di Hulanda, Mark Rutte, a duna e Canadesnan un conseho na e Canadesnan tocante e consumo di cannabis durante su bishita na e pais Norteamericano aki, net un siman despues di cu Ottawa a legalisa e uzo di droga.
Ora cu e puntr’e pa su opinion tocante esaki, Rutte a contra e historia di un familiar di dje cu a sufri di problemanna grave di salud mental pa e consumo excesivo di e mata.
“Marihuana cu por wordo cumpra awendia ta hopi mas fuerte, locual ta malo pa e salud, specialmente pa nos hobennan”, e Prome Minister di e pais Europeo, caminda cu e posesion, consumo y e benta di al menos cinco gram di cannabis den coffee shop ta permiti desde 1976.
E miho manera pa trata e droga ta di no cuminsa cu su consumo. Por zona conservador, pero mi ta urgi boso pa no haci esaki”, Rutte a bisa, den compania di e Prome Minister Canades, Justin Trudeau, durante un discurso pa muchanan di scol secundario. “Si boso haci esaki, sigura boso mes di no bay over na otro droganan”.
Ademas, Rutte a bisa cu, compara cu Canada, su gobierno tin “un focus diferente ariba e asunto aki, cu no ta completamente exitoso” y el a agrega cu autoridadnan Hulandes ta studiando posibel reformanan na leynan Hulandes, ya cu e coffee shopnan ‘awo no tin e forma di obtene e producto cu nan ta bende, di forma legal’.
Canada a bira e di dos pais despues di Uruguay y e prome di e paisnan di e G20 den legalisa completamente e cultivo, benta y consumo di cannabis. Trudeau a bisa cu e ley nobo aki ta permiti elimina “e contacto cu e personanan tabata tin cu delincuentenan”.