Prome Minister Evelyn Wever-Croes: Ta publica e documentonan y ta bay den deliberacion riba su contenido

Un biahe cortico, pero di curashi, pa Hulanda pa atende cu asuntonan di nos pais dunando cara na mandatarionan Hulandes den varios reunion prome y despues di e reunion principal cu ta e Conseho di Minister di Reino na Den Haag. Pa Prome Minister Evelyn Wever-Croes, e biahe aki tawata intenso cu reunionnan largo henter dia.
Durante e reunionnan na Hulanda entre Secretario di Estado Knops y Prome Minister di Aruba, Sr. Knops a dicidi di honra e peticion di Prome pa publica e documentonan cu tin di haber cu e fiansa y e reunion di Conseho di Minister di Reino. Esaki pa Aruba ta hopi importante pasobra awor por sigui un debate habri caminda tur hende por tuma nota di e documentonan. Mientrastanto e documentonan a wordo manda tambe pa Parlamento di Aruba y pa Parlamento Hulandes. E documentonan aki ta disponibel pa un y tur cu kier tin acceso of kier studia nan y den e siguiente dianan Premier Wever-Croes lo indica con ta sigui pa atende cu e diferente condicionnan cu tin pa cu e fiansa.

“Tin negociacionnan andando cu Hulanda, e caminda pa dialogonan a habri y ta teniendo cuenta cu e opinionnan di Aruba den esaki tambe. Mi ta spera cu e transparencia aki por yuda den e debatenan cu tin riba e topico maske no ta e producto final pasobra tin cambionan caba cu a wordo palabra awe despues di reunion di Conseho di Minister di Reino y den e siguiente dianan talves tin mas cambio”, Prome Minister a duna di conoce.
Den curso di siman Premier Wever-Croes lo duna mas informacion riba e diferente cambionan cu talves por wordo proponi pa por yega na un consensus. Hecho ta cu Hulanda a presta Aruba 200 miyon Florin, nos ta pidiendo un fiansa mas di 200 miyon Florin. Despues pa lunanan october, november y december probablemente e lo ta un fiansa di riba 100 miyon Florin. Hulanda ta presta nos un total di mas cu 500 miyon Florin.
“Teniendo cuenta cu esaki, Gobierno tambe ta compronde cu nan kier tin un poco mas supervision y algo mas di bisa con e placa ey ta wordo inverti. Den e cuadro ey ta trahando hunto pa mira si por yega na un consensus”, Prome Minister Evelyn Wever-Croes a expresa desde Hulanda.

Comments

comments