DEN HAAG – Minister Plenipotenciario Guillfred Besaril a bin ricibi Prome Minister mr. Evelyn Wever-Croes na su yegada na Hulanda. Tambe na aeropuerto Schiphol tabata presente Re-presentante di Aruba na Union Europeo Eddy Paris y director a.i. di Arubahuis mr. Glenn Ling.
E siman aki Prome Minister Wever-Croes lo hiba diferente combersacionnan cu mandatarionan Hulandes, manera Prome Minister di Hulanda Mark Rutte, Minister pa Asuntonan di Exterior Stef Blok y Secretario di Estado pa Asuntonan di Reino drs. Raymond Knops. Tambe premier Wever-Croes lo reuni cu vice-presidente di Raad van State mr. Piet Hein Donner.
Diaranzon awor Prome Minister Evelyn Wever-Croes lo tin un audiencia cerca su Mahestad Rey Willem Alexander.
E bishita di trabao aki di Prome Minister Evelyn Wever-Croes ta brinda e oportunidad pa lanza e projecto districto 297 na Hulanda. Tambe e prome mandatario lo tene un charla pa Genootschap Nederland Aruba, cual encuentro lo ta na Centro di Prensa Nieuwspoort na Den Haag.
Minister Besaril di su banda a yama Prome Minister Wever-Croes bon bini na Hulanda y a bisa cu hunto cu e staf y personal di Arubahuis lo brinda Prome Minister Evelyn Wever-Croes e sosten nesesario pa haci e prome bishita oficial di sra. Wever-Croes como prome mandatario di Aruba uno fructifero.
Potretnan ta cortesia di Cas di Aruba