Diahuebs ultimo, Aruba a cera conoci oficialmente cu e Procurador General nobo di Aruba sra. Amalin Flanegin y tambe dos hues nobo. Procurador General sra. Amalin Flanegin a wordo presenta durante un ceremonia solem y oficial presidi pa Presidente di Corte di Husticia sr. Mauritsz de Kort.
Durante e sesion aki nos Procurador General a haya e oportunidad pa comparti su vision y preocupacionnan y manera ta conoci di sra. Flanegin, esaki a wordo treci padilanti na un forma determina pero tambe comprometi. Durante e ocasion aki tambe Aruba a cera conoci cu dos hues nobo; Mr. Brandt y Mr. Pijnenburg. Mr. Pijnenburg ta trata casonan di impuesto.
Presente pa e ocasion aki tawata Su Excelencia Gobernador di Aruba Alfonso Boekhoudt, Presidente Parlamento di Aruba Edgar Vrolijk, Prome Minister Evelyn Wever-Croes, Minister di Husticia Rocco Tjon, y varios otro dignatario.
Prome Minister a expresa di ta hopi orguyoso cu Aruba tin un hende local y un hende muhe como nos Procurador General nobo. Sra. Flanegin tin tur capacidad y cualidad cu tin mester pa por guia nos Ministerio Publico aki na Aruba. Ministerio Publico ta un organo totalmente independiente. Gobierno no tin niun influencia den Ministerio Publico y Procurador General ta percura pa esey sigui asina.
“Den un comunidad chikito no ta facil y p’esey mas aun nos ta aprecia y nos ta respeta e determinacion cu sra. Flanegin ta demostra.”, Prome Minister a remarca.
Den nomber di Gobierno di Aruba, Prome Minister ta desea Mr. Brandt, Mr. Pijnenburg, y nos Procurador General sra. Flanegin hopi exito.
