MFA Paradera a keda inaugura diahuebs anochi. Un multitud grandi a presencia e bunita momento cu a cende e luznan pa accentua e letranan ‘Cas di Mito’ manera e bunita edificio aki a wordo yama. Un nomber bon mereci, di esey ningun hende ta duda. E edificio supernoderno aki, diseña pa e hoben arkitecto Jouel Croes, ta e logra unda e pueblo di Paradera di awor pa dilanti por bay haci su pagonan di awa y coriente, busca formularionan di Censo, bishita e biblioteca of djis drenta pa combersa cu bisiñanan ya cu tin un lugar di recreo eyden.
E nomber ‘Cas di Mito’, dedica na e erudita Mito Croes, kende no mucho tempo pasa a fayece, ta mas cu na su logra. Di esey no tin duda cerca ningun hende. Prome Minister Eman a perde un gran amigo y un tremendo consehero riba tur tereno hudicial, tambe tereno social. Nan tabatin contacto a base diario cu otro pa discuti tur loke cu tin cu discuti y delibera ora bo ta maneha un pais. Durante su discurso Eman a pone enfasis riba su amistad cu Mito Croes, pero tambe e balor grandi cu Mito tabatin pa Aruba y su bario stima Paradera. “Di Casibari pa Marawiel, di Matividiri pa Sero Pita, di Piedra Plat pa Cero Cristal, Mito a cana den tur barionan aki. Su curason a palpita di amor pa e barionan aki y su hendenan. Mito a dedica su bida na su pais. El a entrega su inteligencia y su talentonan na pone Aruba central den mundo. Pa Aruba por a cosecha respet den Reino Hulandes.” Prome Minister tabata falta superlativo pa elogia e gran maestro dr. Mito Croes, kende a laga un bashi grandi atras cu su fayecimento. Viuda di Mito Croes, Rosita Croes-Madari tambe a papia di e persona Mito, pero tambe di tur loke Mito tabata kere firme aden, manera un bon educacion y un bon futuro pa Aruba y su hendenan.
Despues di su tremendo discurso den cual na mas di un ocasion e tabata skerpi den direccion di Hulanda, Prome Minister Eman hunto cu e director nobo di MFA Paradera, sr. Elton Hart y sra. viuda Rosita Croes-Madari a cende a luznan cu a reflecta riba e muraya blanco y e nomber Cas di Mito a resalta. Cu aplauso grandi e bario y demas invitado a duna honor na e yiu di Paradera Mito Croes y aunke no presente fisicamente, por a sinti cu den espirito e tabata presente mey mey di su famia grandi, amigonan y demas invitado cu semper a aprecia pa e hende humilde, humoristico y corecto cu e tabata.