Durante un ceremonia di firmamento den e sala di Conseho di Minister nobo den edificio di Cocolishi, traspaso di propiedad di Valero pa gobierno di Aruba a tuma luga. Parlamentarionan di fraccion di partido AVP tabata presente, tur Minister, ehecutivo y conseheronan huridico di Valero y team negociado completo. Tabata momentonan festivo, di alegria, emocionante, pero na mes momento un poco nostalgico pasobra ta cera un capitulo pa habri un otro. Valero cu pa hopi aña tabata un bon partner di Aruba ta bay pa haci luga pa CITGO.
Prome Minister Eman: “Awe ta un dia historico. Den pasado nos a yega di habri e refineria bek, momentonan cu tabata importante pa Aruba. E biaha aki e reapertura ta bay acompaña pa un hecho historico, pasobra pa prome bes Aruba ta bira doño di e refineria. Esaki despues di 92 aña cu e refineria a establece su mes na Aruba.” Eman a bisa cu Valero tabata semper un bon partner di Aruba y Aruba na su turno ta orguyoso di por tabata partner di Valero. “Awe cu nos ta yegando e punto di finalisacion di nos relacion, mi kier gradici Valero un bes mas pa su compromiso cu semper e tabatin cu Aruba y tambe pa a tuma e curashi di habri e refineria na momentonan cu e retonan tabata grandi. Mas ainda mi ta gradici Valero pa na varios ocasion den e añanan cu a pasa a mantene e empleadonan riba nan payroll apesar cu e futuro no tabata mustra bon, dunando nos e oportunidad pa haya un partner nobo.” Pa tur esaki Eman y tambe de Meza tabatin palabranan di elogio pa e forma digno con Valero a trata Aruba y su hendenan. Awor Valero ta pasa su propiedadnan pa gobierno di Aruba cu na mes momento ta bay den un lease deal cu CITGO Petroleum Corporation pa opera e refineria.
Martin Parrisch, CEO di Valero, a bisa cu esakinan ta momentonan ‘bittersweet’ p’e. “Mi ta aprecia masha tanto e bunita palabranan di Prome Minister y den nomber di Valero kier gradici’e pa esey. Loke ta tumando luga awe ta bon pa Aruba. Mi ta haya masha ‘great’ cu e refineria ta habri bek.” Parrisch a bisa di ta aprecia e trabou duro cu a wordo haci di tur banda pa por a yega na firmamento di e documentonan di traspaso. E tabatin palabranan di masha elogio pa Minister de Meza pa su perseverancia, pa pusha duro apesar di contratiempo y a logra. “This is quite impressive”. Pa Richard Arends, lider di e team negociado, Parrisch tabatin hopi elogio. “Dia y anochi, durante e ultimo lunanan mi tabata den contacto cu ne y segun mi e ta e persona cu mas mi a yega di ‘text’ den mi bida.” A sigui un merecido aplauso despues di esaki.
Minister Mike de Meza a bay bek den tempo y a recorda esnan presente con na 2009 a bin haya e refineria cera. “Tabatin hopi deliberacionnan entre nos mes y tambe cu Valero pa mira kico haci pa habri’e bek. Nos a bay hopi caminda hunto cu Valero, hopi hende tabata envolvi pasobra reapertura di e refineria tabata un prioridad grandi. Mi kier gradici e CEO anterior di Valero sr. Klessy, un bon amigo y tambe e team di Martin Parrisch cu for di prome dia tabata interesa y hopi envolvi.” De Meza a gradici Ray Buckley di Valero Aruba y e team negociado completo. “We went to the ups and downs together”. Pa Richard Arends de Meza tabatin palabranan special di aprecio. Un homber cu ultimo tempo no tabata drumi, de Meza a conta. Un awacero di aplauso a sigui.
Despues tur hende a hisa nan glas di champagne pa brinda riba e exito di e dia. Futuro di Aruba ta tremendo. Awor ta sigui padilanti.