Awe marduga Aruba a wordo sorprendi cu un tempo di awa hopi pisa, cu a cuminsa rond di 4’or di mainta y por bisa cu algun interupcion te cu 10’or di mainta a yobe sumamente fuerte. Segun Prome Minister di Aruba, Mike Eman, un area grandi di nos isla a wordo cubri cu tur e awasero aki. Ta trata di un sistema di convergencia intertropical cu ta un sistema cu bo no por pronostica di un forma delanta manera ora cu tin tempestadnan tropical cu ta bin riba Aruba. E cantidad di awasero tabata remarcablemente halto. Tin midi te na e momentonan aki casi 70 milimeter di awa. Si pone den comparacion cu Matthew, cu tabata core banda di 40 milimeter, ta papiando di un cantidad hopi grandi di awa. Ta trahando for di sala di emergencia di Rampenbureau caminda cu a bin hunto un cantidad di departamento cu ta esencial pa duna asistencia na nos comunidad den momentonan asina. Naturalmente pa pronostica e tempo cu ta bay bin ainda y kico mas lo mester wordo haci.
Manera cu a wordo indica na prome minister, ta parce cu e pio a pasa y esey sigur ta un bendicion pasobra e cantidad di awa aki en berdad, manera cu a haci e recorido rond di Aruba, a haci hopi daño den un corto tempo.
Durante e conferencia di prensa cu a tuma luga den un forma extra ordinario, tabata tey presente representantenan di WEB, comandante di Brandweer hunto cu su staff. Tambe Departamento di Salud Publico tabata tey presente, Cuerpo Policial, por medio di alto comisario y su staff tabata tey presente. Sociale Zaken, sra. Hernandez, directora, tabata tey presente. Di parti di DOW, sr. Marlon Croes tabata tey y tambe Minister di Infrastructura tabata tey presente y naturalmente Rampenbureau, representa pa sr. Jaime Donata y su ekipo.
Prome minister a gradici tur esnan cu a mobilisa rapidamente pa awe por a bin hunto y cuminsa traha con pa asisti nos comunidad, tanto Cuerpo Policial como ambulance, como brandweer y tur e materialnan pisa cu tin cu uza pa asisti nos comunidad, ya ta eyfo trahando, pero na e mesun momento tambe ta trahando pa por inventarisa mas miho, kico ta e yudansanan adicional cu ta bay ta necesario den e siguiente oranan. Pesey e reunion aki tabata ta tambe, pa miho sincronisa e esfuersonan pa nos por asisti nos comunidad den e momentonan aki. Na momento cu e awasero a inicia for di 4’or di mainta te cu 10’or awe mainta, y tabata yobe sumamente duro, por bisa cu practicamente tur caminda na Aruba a sinti e consecuencianan di e awasero aki.
Tabata tin reportahe for di varios bario, caminda cu yamadanan tabata drenta na tanto brandweer, como tambe Cuerpo Policial, pero tambe tabata tin casonan no unicamente di inundacion pero tambe tabata tin un caso di lamper, caminda cu un persona na Coba Lodo, cierto momento a hay’e confronta cu un lamper cu a dal. Segun e reportahe no directamente riba e persona, sin cerca di e persona, cu e consecuencia cu el a perde tino un rato, pero a bin bek y no ta den un estado critico y por a wordo yuda. Logicamente esey ta duna indicacion con peligroso e situacion ta.
Otro areanan manera Madiki, Koningstraat, Brusca, cu tambe tabata tin hopi yamada. Cas Ariba, Coba Lodo mes, caminda cu tabata tin e incidente specifico. Palm Beach, hopi yamada di inundacion a drenta. Pos Chikito, Sabana Liber, Kamerling Onnestraat, Sero Patrishi,
Henter e area di Madiki, Rancho, Minister Sevinger y Minister Eman a pasa eynan, asistiendo famianan y por a nota cu un biaha mas e area di Madiki a haya hopi awa. Hopi yamada tambe a drenta Cuerpo Policial y otro instancianan di emergencia pa asisti e bario aki. Hasta un bario cu no semper ta esnan cu ta riba e lista prome cu ta duna indicacion di inundacion. E biaha aki tambe a haya señalnan di esey.
Rooinan completamente yen cu stroming grandi, damnan tambe. Un cantidad sumamente impresionante di awa y naturalmente ta yama bon bini, pero esaki a bin cu basta reto pa nos famianan.
Segun calculo y pronosticonan di Meteo, tin tipo di momentonan di awasero cu lo ta tiki mas dificil pa pronostica cu otro. Aparentemente esaki tabata uno cu ta cay den categoria di dificil pa por a anticipa riba dje.
Prome Minister a duna comunidad e siguransa cu tin full atencion di tur e organisacionnan pa e situacion cu tin. Tin ekiponan tambe cu ta bay saliendo di Sociale Zaken, hunto cu DOW y Polis y eventualmente ora cu tin mester di evacuacion, a haya tambe e aprobacion pa habri un shelter na Centro Deportivo Frans Figaroa y si ta bay tin necesidad pa hiba personanan eynan, lo bay tin diferente instancia cu lo yuda den esey. Ora cu Sociale Zaken presenta of miembronan di cuerpo policial, famianan cu tin necesidad pa busca un caminda mas seco pa drumi awe nochi, tin un espacio basta grandi cu acomodacion basta completo na Centro Deportivo Frans Figaroa pa por yuda nos hendenan. Cruz Cora tambe ta trahando di ora cu e prome awaseronan a cuminsa cay. A mobilisa henter e ekipo di Cruz Cora pa sostene nos comunidad den e oranan mas dificil aki. E esfuersonan lo keda, apesar cu si no lo tin awasero mes mas, pa inventarisa bon kico ta e daño cu a wordo haci, kendenan ainda mester di asistencia, pa asina laga ningun hende sin ayudo, sin asistencia. Pesey e organisacion aki ta pa nos tur por ta prepara cu tur e ekiponan, cu tur personal necesario pa duna comunidad e asistencia.
Prome Minister a enfatisa cu a wordo sorprendi pa henter e awasero aki. Tabata den preparacion pa awe ricibi Sinterklaas den un ambiente grandi cu tur e muchanan. Tabata den expectativa di esaki, pero e prome oranan di mainta a bay den un dialogo continuo cu e fundacion cu ta haci e preparacionnan pa Sinterklaas. Club Don Bosco ta esun cu lo wordo habri y e ora Frans Figaroa lo keda Standby. Importante pa toch hoben y muchanan ta keda pendiente. E fundacion a informa cu durante e dianan aki toch nan ta bay mira con nan por organisa momentonan cu nos hobennan por encontra cu Sinterklaas pa asina e ambiente ey tambe, specialmente riba dia di mucha, toch ta lamentabel cu e fiesta grandi aki no por a bay door, pero tin un reto grandi tambe pa atende cun’e, cual ta e inundacion den hopi cas, hopi bario y pesey tin e conferencia di prensa, pa hunto haci e trabao den un forma coordina y sincronisa cu tur e departamentonan.
Prome Minister a gradici tur e departamentonan cu hopi atencion y dedicacion, cu e trabaonan cu a haci den pasado pa sincronisa y pone prioridadnan, naturalmente ta haci’e un esfuerso cu por coordina mas rapido ora cu cada un cu tur e experiencia cu a acumula den otro momentonan, ta bin hunto, pa por reacciona rapido riba e necesidad cu tin den nos comunidad. Na comunidad, un disculpa pasobra ta naturalesa. Como Gobierno ta sinti responsabel. E rooinan ta yen, rioleringnan ta yena, tin inundacion y tur esaki ta crea un inconveniencia pa nos comunidad, pero ta spera den e siguiente oranan cu e lo bira menos y esnan cu tin mester di yudansa por conta riba esaki.
Te na e momentonan aki scol ta keda normal. E pronostico di meteo ta bisa cu no ta spera mucho mas awa. E parti pio a pase. Gobierno lo keda sigui e tempo cerca. Awor aki e tin basta rato cu el a stop di yobe pisa.
- Latest
