Diasabra 7’or di mainta, Prome Minister Mike Eman tabata riba punta di Sero Cristal pa bishita e 16 hobennan di Formacion Social realisando nan ehercicio militar. Cu hopi entusiasmo, e mandatario a expresa palabra di estimulo cu e mucha hombernan aki, entre 18 y 24 aña, pa duna nan animo pa sigui cu e obhetivo importante cu nan pone nan dilanti.
Den compania di Sergeant Lacle y varios Corporal di Arumil, Minister President Eman a cana den e mondinan di Sero Cristal caminda e hobennan ta for di diabierna anochi pa set up diferente post y a pasa e anochi prome den e campamento. Ora cu e mandatario a yega na cada post, ya caba e hobennan a lanta, drecha cama, bisti y tabata preparando nan cuminda di e mainta. E parti aki di entrenamento ta enfoca riba e disciplina, preparacion, team work, pero tambe con pa tene warda. Durante anochi, un ta drumi un ora y mey pa dos, mientras cu e otro ta vigila.
E entrenamento ta similar na esun cu militarnan di Arumil ta pasa aden. Diferencia ta cu den Formacion Social ta dura 4 luna so, cual ta un di e tres fase cu e participante ta haya banda di cursonan y tambe practica cu stage na un compania local. “Un di e temanan cu ora mi papia cu nan, ta mas pisa, no ta simplemente e parti fisico di haci tur loke un soldat tambe ta haci, pero hopi di nan tabata den un ambiente cu no tur ora tabatin un compromiso pa cu un otro persona of e compromiso pa cu nan mes. Den e formacion aki nan ta desaroyando e habilidad di responsabilidad personal, pa bo camarada y tambe pa cu comunidad,” asina Minister President Eman ta splica.
Premier ta hopi contento cu den e trayectoria di SVT hopi a alcansa y logra transofrma nan bida. Formacion Social ta un oportunidad na un momento di nan bida cu ta hopi necesario pasobra nan ta den un duda, desorientacion y den buskeda. “E programa aki hustamente ta bin na e momento critico ey cu nan ta busca orientacion, buscando guia y e man pa yuda nan haci un siguiente paso positivo den nan bida y mi ta contento cu e programa tin su exito y cu nos por continua cun’e.”
Pa su persona, e bishitanan aki ta un compromiso sumamente importante y semper tin un luga den su agenda. “Nos a bin trempan pa brinda e sosten manera nan tin’e di Arumil, manera nan tin’e di e staff completo di SVT; y si nan sinti’e di Gobierno, di Minister President, nan ta mira cu loke nan ta haci ta wordo considera importante. Hunto cu nan esfuerso ta duna nan mayornan, duna nan amigonan y duna nan bisiñanan un motibo pa confia den nan, ta orguyoso di nan y sostene nan den e proceso importante pa reconkista nan bida y un futuro nobo,” asina Prome Minister Eman a finalisa bisando.
Pa mas informacion tocante e programa di Formacion Social – SVT, por haya riba e pagina di Facebook di mesun nomber, of tambe na oficina di SVT na sede di Marinierskazerne na Savaneta cu ta habri di dialuna pa diasabra durante orario di oficina.