Prome Minister di Corsou, Gilmar ‘Pik’ Pisas, a señala cu Corsou tin mester di un centro nobo di prostitucion, segun un articulo publica riba Curacao.nu. Esaki por establece na ex-Campo Alegre of na otro luga adecua. Durante e sesion di pregunta parlamentario, Pisas a subraya cu e gobierno ta trahando den un maneho di prostitucion, ya cu actualmente no ta existi un maneho al respecto.
Pisas a declara: “Como polis, mi a adkiri hopi experiencia. Nunca mi a bay Campo Alegre pa placer, pero tin un gran necesidad di un centro manera esaki.”
Durante e debate riba e compra di Campo Alegre, el a menciona cu el a ricibi hopi peticion pa habri Campo Alegre bek.
Parlamentario independiente Zita Jesus-Leito, a critica e gobierno, señalando cu e compra di Campo Alegre a tuma luga nuebe luna pasa y cu solamente awo a haya sa cu e compania di accounting SOAB ta realisando un estudio di factibilidad riba e futuro di e tereno. Segun Jesus-Leito, esaki mester tabata cla prome cu e compra.
“Cos ta birando caro. Ta inaceptabel cu gobierno tuma e pasonan aki y duna e prome minister e chens pa hac u oferta den un fin di siman,” Jesus-Leito a bisa.
Maneho y regulacion
Jesus-Leito tambe a expresa su preocupacion, p’e falta di maneho. El a puntra con e gobierno por a cumpra Campo Alegre cu e intencion di convirtie den un centro di prostitucion sin un plan cla of un maneho defini. El a señala cu na otro luga di Corsou a habri centro di prostitucion ilegal y a puntra si e prome minister tabata na altura di esaki.
“Nos tabatin un maneho di tolerancia cu control. Awo e situacion ta descontrola. Prome minister por splica kico e lo bay haci pa regula esaki?” el a puntra.
Pisas a reconoce cu e intencion den e compra di Campo Alegre tabata pa explot’e como un centro di prostitucion. Ta spera tin un reaccion di e estudio di SOAB dentro di tres luna, pa cual lo tuma un decision riba e futuro di e tereno.
Cu e paso aki, gobierno di Corsou ta spera di por regula miho e situacion rond di e prostitucion y atende e actividadnan ilegal, na momento di satisface e demanda evidente di un centro di prostitucion controla y sigur.