CANBERRA, Australia- Den un discurso emotivo dialuna, e prome minister di Australia, Scott Morisson, den forma publico, a pidi despensa na e miles di victimanan di abuso sexual den e pais.
E disculpanan ta forma parti di un proceso den cual varios investigacion a revela cu durante varios decada cerca di 10 mil mucha a sufri di abusonan sexual den institucionnan oficial y publico di Australia.
“Awe nos ta reconoce y ta afronta e llanto perdi di nos yiunan”, el a bisa den un auditorio full yen, den e capital Canberra den cual varios victima a acudi.
“Nos mester tin e humildad pa cay na rudia dilanti di e personanan cu a wordo abusa y roganan pa pordon”.
E investigacion cu a yega na su fin december ultimo, a centra su mes den e testimonio di 8 mil victima di abusonan den organisacionnan manera misa, scol y clubnan deportivo.
Cu’n bos cu ta tembla rato rato mientras e tabata lesa, Morisson a reconoce e sufrimento di e victimanan y a condena cu fervor e fayonan institucional.
“Pakico nos ta ignora e yoramento di e muchanan y di e mayornan? Pakico nos sistema di husticia ta ciego pa inhusticia? Pakico nos a tuma asina tanto tempo pa actua?
Y el a agrega: “Manera un di e sobrevivientenan a yega di bisami: ‘No tabata un enemigo stranhero cu a haci nos esaki. Esaki a wordo haci pa Australiano contra Australiano, enemigo den teritorio,enemigo di nos inocencia'”,
Hopi di e sobrevivientenan presente a mustra conomovi pa e palabranan di Morrison, aunke despues, aunke despues di e acto nan a mustra nan frustracion pa e respuesta di gobierno pa cu e investigacion. “E victimanan a yega na e luga aki cu’n curason carga di tristeza”, Leonie Sheedy a bisa. Sheedy ta e director di e Red di Asistencia na e Víctimanan di Abuso Sexual, conoci como Care Leavers.