Recientemente Prome Minister di Aruba, Sra. Evelyn Wever- Croes tabata di bishita na Rode Kruis Aruba. Sr. Michel La Haye, director di Rode Kruis Aruba a duna Prome Minister un recorido den e facilidadnan di Rode Kruis Aruba.
Esaki tabata e prome biaha cu un Prome Minister ta bishita Rode Kruis Aruba. Durante su bishita el a haya un bon splicacion di kico e boluntarionan ta bezig cun’e, tanto como e servicio di emergencia como tambe e prevencion di disaster. Tur esaki a wordo treci na su conocemento. Rode Kruis ta gradicido na Prome Minister pa su bishita y ta spera di tin un bon cooperacion cun’e tambe.
Sra. Evelyne Wever- Croes a haci un bishita na Rode Kruis, pa asina por mira pa su mes e facilidadnan y pa nan mira con Rode Kruis ta prepara su mes ariba tur eventualidad. Tambe Prome MInister a haya un presentacion di tur loke Rode Kruis a haci den pasado, tanto aki na Aruba, como dne Caribe. Specialmente pa mira aworaki con Rode Kruis ta preparando pa tur e desaroyonan nobo cu tin. Tin un ekipo hopi dinamico ta traha eynan, un combinacion di boluntarionan y hendenan cu ta traha na Rode Kruis.
E personanan aki ta haci un trabao noble y bunita cu a duna un bon impresion cerca Prome Minister. Gobierno a tuma na su encargo pa yega na cierto areglonan cu Rode Kruis y awo ta den e fase di revisa e diferente palabracionnan y con pa hinca nan den otro. Sra. Wever- Croes tin un sentimento mixto, ya cu ora Rode Kruis te envolvi den algo ta pasobra cu cosnan no ta bayendo bon. Pero sinembargo, Sra. Wever- Croes ta sigur cu Rode Kruis Aruba ta prepara pa tur eventualidad.