Dialuna mainta, Prome Minister Evelyn Wever-Croes a reuni cu ATIA pa asina toca puntonan di interes, y/of preocupacionnan cu por tin di nan banda of di banda di Gobierno di Aruba. Prome Minister a indica cu e reunion a bay bon y cu nan a logra pasa riba varios temanan importante.
Mercado Laboral
Un tema di hopi importancia cu semper ATIA ta trece dilanti ta e mercado laboral na Aruba, mirando cu sector priva tin hopi necesidad di hende pa traha. Pa cu esaki, a bin cu un taskforce cu ta trahando riba cierto recomendacionnan cu a bin di sector priva y sector publico. Prome Minister a indica cu e ta bayendo den e bon direccion, pero mester mas atencion pasobra e no ta dunando tur e resultandonan desea.
Situacion Financiero
Otro tema importante cu a wordo treci dilanti durante e reunion ta e hecho cu Gobierno a crea espacio financiero y cu tur aña e presupuesto tin un surplus. Debi na esaki, Gobierno lo aloca tur aña un fondo pa inversionnan publico na Aruba. Esakinan ta inversionnan cu Gobierno di Aruba ta paga, y esaki hunto cu sector priva, lo mester amplia e capacidadnan cada biaha mas, pa e proyectonan aki wordo ehecuta door di sector priva.
Relacion cu Hulanda
Tambe a bin dilanti e tema di e relacion cu Hulanda, diferente aspecto di e landspakket, y e bishita di Secretario di Estado nobo señor Zsolt Szabò, cu a reuni cu Prome Minister riba varios tema importante.
Otro temanan relevante
Durante e reunion a intercambia ideanan riba e tema di digitalisacion, e proyecto di eGovernment y e preocupacionnan cu ATIA tin pa cu e avanse, of falta di avanse den e trabounan di Directie Infrastructuur en Planning (DIP).
Prome Minister a expresa cu e reunion tabata uno positivo na unda Gobierno di Aruba y representantenan di ATIA por a comparti tur nan preocupacionnan. Tambe a haci varios palabracion pa e siguiente tempo padilanti.
