Siman pasa Minister President Evelyn Wever-Croes a reuni cu tur hefe di Departamentonan cu ta resorta bou di Ministerio di Asuntonan General. E intencion ta pa e reunionnan aki cu Prome Minister y Hefenan di Departmento tuma luga cada dos of tres luna.
Durante e reunion informativo aki a toca varios tema di interes comun entre otro e tema di innovacion y e vision di Gobierno pa innova servicio. Innovacion ta trece cu ne mas eficiencia na mes momento tambe mas control y transparencia cualnan ta elementonan importante pa combati corupcion.
A papia tambe di trainingnan y sosten cu por wordo brinda na tur hefe di Departamento den Gobierno mes pa asina nan por eherce nan posicion na trabou como hefe miho posibel.
Tur presente a haya oportunidad pa trece nan puntonan dilanti. Por a nota un satisfaccion grandi entre e hefenan di Departementonan pa cu e reunionnan aki cu nan tin cu Minister President. E sintimento cu porfin nan a haya oido y cu Minister President tin comprension pa e problemanan y situacionnan cu nan ta aden. Ta bisto cu nan ta aprecia transparencia y cu nan ta wordo scucha y haya e oportunidad pa duna nan contribucion.
Na final di e reunion, Minister President Evelyn Wever-Croes a expresa cu e ta sumamente contento y satisfecho cu e hefenanan di Departamento ta asisti na e reunionnan aki pero principalmente pa nan participacion activo den yuda pensa con ta soluciona e problemanan grandi di nos pais.