Prome Minister a bishita Expo Atelier “God’s Artists in Times of Covid”

Diadomingo ultimo atardi, Prome Minister Evelyn Wever-Croes tawata presente na inauguracion di e expo di Atelier. Representado su colega Minister Xiomara Maduro, Prome Minister a gradici sr. Elvis Lopez y Atelier pa e invitacion. Esaki ta un expo hopi special, Dios su artistanan den tempo di Covid (God’s artists in times of Covid) na unda e creatividad di artistanan a wordo exponi.

Den su discurso na e ocasion, Prome Minister a expresa: “Covid a trece retonan enorme desde maart 2020. Ciudadanonan di nos Pais a wordo forsa pa adapta y sacrifica, cada un di nos den nos propio manera. Sinembargo, Covid a forsa nos tambe pa ta mas creativo. Como un pais, artista y no artista, nos tur a mustra nos forsa creativo. Nos a encontra maneranan nobo pa deal cu e reto y limitacionnan cu e pandemia a forsa nos den dje.  Berdaderamente mi ta sinti orguyo pa e manera cu e comunidad di Aruba a maneha e pandemia. E pandemia a influencia e creatividad di nos Arubianonan y esaki ta duna mi un alegria. Arte y cultura ta un parti importante pa e gobierno actual y den e siguiente gobierno arte y cultura lo tin un rol ainda mas importante.”

Na final di su discurso, Prome Minister a gradici tur participante pa kere den nan mes, den nan creatividad y tambe pa kere den Aruba. Premier a gradici tambe Atelier pa e iniciativa aki y pa ta tambe un socio activo di Gobierno di Aruba den promove arte y cultura. Prome Minister a laga un dicho conoci atras pa encurasha nos pa nunca stop di ta creativo: ‘Un artista ta dip su pincel den su propio alma y ta pinta su propio naturalesa den su cuadronan. Por fabor, nunca stop di pinta. Nunca stop di crea bo arte. Nos tur tin mester di dje. Nos generacionnan di futuro tin mester nos creatividad’, Prome Minister a expresa.

Prome Minister a disfruta di tur obra di creatividad presenta y na final a ricibi for di man di sr.Elvis Lopez un bunita recuerdo di su bishita.

Comments

comments