TIJUANA, Mexico- Un paar di shen migrante for di e caravana cu a sali for di Centro America rumbo pa Merca, a yega na e frontera Mexico- Merca. Nan a yega cu bus na e ciudad di Tijuana, cual ta e ciudad fronteriso entre Mexico y Merca.
Mas o menos 20 migrante a subi riba e heki na frontera, pero no a pasa over di dje. Border Patrol Mericano no a interveni.
E migrantenan tin un biahe di miles di kilometer tras di lomba. E grupo den su totalidad ta consisti di casi 5 mil persona procedente di Honduras, Guatemala y El Salvador. E gran parti di e caravana ta leu di yega e frontera.
Hopi di e migrantenan ainda ta na Guadalajara, na 2400 kilometer di e frontera. Un otro grupo grandi ta den Ciudad di Mexico. Nan ta wordo ricibi eynan y por pasa e anochi den tent. Tambe tin un otro grupo den sur di Mexico.
Un homber procedente di Honduras cu a caba di yega Ciudad di Mexico a conta na AP cu e tin dos siman caba cu keintura y cu porfin e por a logra haya antibiotica. E ta determina den drenta Merca: “Nan por pone un miyon di militar na e frontera, pero nos lo logra crusa”.
Autoridadnan Mexicano no tin pensa di laga e migrantenan aki drenta Merca. Presidente Mericano, Donald Trump recientemente a manda 5 mil militar na e frontera. Y migrantenan cu drenta Merca ilegalmente, den futuro cercano lo no por pidi asilo mas na Merca.
Na e frontera entre San Diego y Tijuana ya caba e Mericanonan a cuminsa aumenta e siguridad. Cuatro caminda a wordo cera pa esaki. Ainda tin 23 habri pa e 110 mil personanan cu diariamente ta haci e cruze legalmente.