AHATA a cuminsa cu un awareness campaing pa sostene esun nacional, cuminsando na Januari, ora cu e ley a cuminsa, segun Vanessa Rasmussen – Lew Jen Tai, Administrative Manager, Aruba Hotel & Tourism Association. A cuminsa duna saconan reusabel na diferente supermercado na comunidad como regalo pa tin esaki. A bay aeropuerto tambe pa duna samples na turista, hunto cu un carchi, unda cu ta splica nan riba e importancia di e ley y alabes ta pidi pa nan colabora durante nan vacacion pa sostene e ley.
Tambe a pidi por ehempel Tui, pa colabora cu AHATA y nan tabata asina habri p’e, cu nan a pone e mesun mensahe den nan revista, pa asina informa e turistanan ora nan ta na caminda pa Aruba.
Tambe e hotelnan tin diferente manera cu nan ta informando e turistanan cu nan tin cu atene na e ley tambe y nan a cumpra for di AHATA, pasobra nan ta duna pa comunidad e saconan reusabel di AHATA, pero tambe pa companianan cu ta interesa, ta bende sin ningun costo di ganashi pa AHATA, e saconan reusabel pa asina nan por duna tambe esaki na nan turistanan, pero tambe na nan trahadonan.
E reaccion te awor aki tabata basta bon, basta positivo. Den supermercado, comunidad tabata contento di wak cu nan por haya un saco. Dimes AHATA ta purba di bay mas supermercado cu por, pero tin cu haci’e a base di e cantidad di saconan cu AHATA a ordo pa e awareness campaign aki. Ainda tin mas, dus nan lo bay sporadicamente den e diferente areanan pa otorga esakinan, Rasmussen a splica.
Por ehempel un di nan ta Hyatt. Nan ta uza saconan di papel pa ora nan tin cu duna e cuminda cu a resta na e turista, enbes di e saco di plastic. Tambe por mira den nan sushi, tin specifica pa recycling system.
Asina tin diferente otro ehempel den e hotel area.
Pa loke ta e otro hotelnan, Rasmussen a splica cu nan a informa nan for di aña pasa caba riba e prohibicion di e saconan di plastic. E ta algo cu aña pasa a sinta sr. Donny Rasmijn hunto cu board di AHATA pa papia riba esaki y a ofrece nan sosten. Pesey a keda constant comunica cu e hotelnan riba e importancia di esaki.
Rasmussen a sigui splica cu e hotelnan a cumpra for di AHATA e saconan reusabel pa asina nan por haci nan mesun promocionnan.
AHATA a extende e oferta di e saconan reusabel tambe na no miembronan di AHATA. Tin companianan cu no ta companianan di AHATA cu a acerca nan y a extende e mesun prijs desconta pa asina ta mas facil pa nan tambe, ofrece na nan empleado y clientenan.
Pa loke ta e prome lunanan, e reaccion ta bon, pero ainda tin diferente compania cu nan mester realisa cu nan tambe ta parti di e comunidad y cu nan tin cu yuda pa cuida nos medio ambiente y duna un bon ehempel.
Sa cu tin diferente persona cu nan ta informando via “Mi tas ta reusabel” facebook page, si nan mira un compania cu ainda ta uza e saconan di plastic pa asina e grupo di “mi tas ta reusabel” por acerca nan y duna nan mas informacion y recorda nan cu ta nan deber tambe pa nan sigui ley.