Durante siman di vakantie di pasco grandi, Heart-Centered Leadership Foundation a organisa un programa di 4 dia pa hoben: Impact Week. Cu lecturanan, procesonan den grupo y weganan interactivo, e hobennan a ricibi hermentnan pa nan por traha riba nan principio y balornan pa forma nan caracter y asina muestra nan calidadnan cu nan tin y demostra ken nan ta door di nan actitud. Tambe nan a haya conocemento di habilidadnan, comunicacion propio efectivo y expresion di emocion y necesidadnan. Impact Week a conta cu 27 participante entre 12 y 17 aña. E participantenan a wordo parti den gruponan chikito cu a wordo apoya door di lidernan den grupo, hobennan adulto cu ta parti di Heart-Centered Leadership Foundation su grupo di mentor ‘Heart-Centered Impact Coaches’. E simbolo di Impact Week tabata un mata, un representacion pa cada un di e participantenan. Cuminsando cu e prome dia caba, e hobennan a siña kico ta haci nan resiliente: con cada parti di un mata ta representa ken nan ta, kico nan ta para p’e, y kico nan mester pa nan por crece fuerte y resiliente.
Cada dia tabata tin un tema cu a contribui na e metafoor di e hoben como un mata, tocando topiconan manera caracter, principio, balor, habilidad, cualidadnan y actitud. Impact Week ta culmina su di 5 dia cu un encuentro na final di mei. Na oktober lo tin un siguiente edicion di Impact Week, un ‘nivel 2’ pa e participantenan unda nan lo por sigui traha riba nan desaroyo personal y habilidadnan di liderazgo personal. Heart-Centered Leadership Foundation ta gradici tur esnan cu a haci Impact Week posibel, en especial e grupo di boluntario cu a traha prome y durante Impact Week. Impact Week ta parti di e proyecto ‘Connecting Hearts’ y ta posibel danki na co-financiamento di CEDE Aruba y Samenwerkende Fondsen Cariben. Pa mas informacion tocante Heart-Centered Leadership Foundation y su programanan pa hoben, por tuma contacto cu nos na 5841211 of por bishita nos website www.hclfaruba.org