E prome fase di Ser’i Teishi ta yegando su final. E ta un area di 6900 m2 y esey ta yenando. Esey ta un indicacion cu Aruba ta uza hopi sushi. Unabes cu e area aki yena full, lo tap’e cu liners. Y esey ta nifica cu lo cuminsa na su fase di descompocision. E lo tuma su aña pa cuminsa baha.
E siguiente fase ta cu lo coba un otro area cual ya caba ta bezig cun’e, pa cuminsa ubica tambe environ bales den dje. Dado momento no lo por sigui coba mas. Pa loke ta e proyecto na Parkietenbos, Sra. van der Biezen no tabata tin mucho info ariba dje, pero si nan ta bezig cu otro plannan pa maneho di desperdicio, pa deal cu e cantidad di desperdicio tanto residencial como comercial. Pronto lo bin un solucion permanente pa locual ta trata maneho di desperdicio pa tur tipo. Probablemente lo bin cun’e ora cu aña habri.
EDUCA COMUNIDAD
E parti di educacion ta un campaña grandi, ya cu tin hopi cos tumando luga. Tin e topico di tarifa social, tin e topico di conscientisacion, e topico di campañanan di promocion. Tin e topico di kico tur ta e problemanan cu tin actualmente na Aruba y tur ta bay hunto. Lo bin materialnan di informacion, lo bin mas den publico pa loke ta trata e actitud pa nos desperdicio, con ta anda cun’e, y con ta cuminsa cambia esaki, pa cambia nos ‘habit’. Na Aruba ta custumbra cu ta tira tur cos afo. Mester wak e desperdicio na otro manera.
RECICLAHE
Tin un grupo so cu ta recicla plastic, y segun Sra. Twyma van der Biezen tin mas gruponan cu ta recicla, p.e. Mondiero, artesanonan cu ta recicla tur tipo di material, palo, plastic, metal manera aluminium, carton, papel. Tin hopi material ariba lista cu hopi di e luganan aki ta traha cu nan. Ta hendenan humilde, artesanonan ta uza tur cos pa traha arte y ta purba di haya tur ariba lista pa asina poco poco forma un laso cu nan. Esun cu ta recicla, tur tipo di plastic, ta Plastic Beach Party. Aruba ta recicla na un scala hopi chikito. E den un lapso di poco mas cu tres luna. Y esaki ta un tempo cortico pa un isla asina chikito, cual ta indicacion cu nos ta produci hopi sushi na Aruba.