Manera ta tradicion di tur aña, Camara di Comercio y Industria Aruba (KvK) a organisa su prome evento di 2017 cu ta su “New Year’s Celebration”. E evento aki ta pa yama un bonbini na un aña nobo den compania di e miembronan di directiva di KvK. Un invitacion a wordo extendi den nomber di e directiva di KvK na diferente stakeholders tanto den sector priva como sector publico pa nan ta presente na e evento social aki.
Apesar di yobida, por a aprecia cu hopi di e invitadonan tabata presente y a disfruta di e celebracion ameno aki cu a tuma luga den e auditorio y riba e balcon di KvK. E presidente di directiva, Sr. Ernst J. E. Mohamed, a hiba algun palabra na e invitadonan y a splica kico e meta pa 2017 di KvK ta: “Trece empresario, gobierno y comunidad hunto.”
KvK ta mira cu pa aña 2017 union ta hunga un rol hopi importante pa por logra e metanan poni nos dilanti pa economia y comercio di Aruba.
Despues di introduci e miembronan di directiva di KvK 2017, tur esunnan presente por a haci uzo di e oportunidad aki pa reenforsa e lasonan comercial. Camara di Comercio y Industria Aruba ta desea henter pueblo di Aruba, en particular tur nos comerciantenan, un prospero 2017 yena di dicha y hopi exito.