E portanan di Nicolaas Store a habri pa e prome edicion di “Compartimi”. Diadomingo mainta, 4 di juni 2017, caranan contento y yen di entusiasmo a presenta ariba e dia aki pa asina haya e contesta ariba e pregunta “San Nicolas por a somenta?”
Den un ambiente relaha Sr. Dufi Kock a hiba tur presente bek den tempo. Bou guia di curator di Fundacion Museo Arubano (FMA), Sr. Renwick Heronimo a pasa un recorido den locual ta trata e infancia y bunita recuerdonan di Sr. Dufi Kock y den e bario cu e la nace. A papia di e desaroyo social y economico prome y despues cu Lago a habri su portanan na Aruba. E refineria a trece hopi cosnan positivo pa nos hendenan y tur cu a biba ariba nos pida baranca. Un desaroyo increibel!
Por ultimo a toca e tema di Segundo Guera Mundial, unda e pregunta finalmente a ser contesta pa Sr.Dufi Kock. E la conta con submarino U-156 a manda un cañon ariba waf na San Nicolas. Ariba e waf aki tabata tin mas o menos 3,000 ton di TNT (explosivo) cual ta hasi cu Lago por a somenta, hunto cu Lago Colony, San Nicolas, Brazil y muy probablemente Savaneta. Esaki lo tabata un parti scur den nos historia cu lo a impacta sigur nos bida di awe. Na e tempo ey den e barionan menciona tabata conta cu por lo menos 20.000 habitante. Nos mester ta agradecido cu nada no a pasa nos. Un mainta sigur masha interesante y den tremendo compania di Sr. Dufi Kock y Renwick Heronimo. Bishitantenan a disfruta di drigidek y pan boyo casero y juice di lamunchi y tamarijn pa compaña e dushi pasa boca.
Compartimi, un iniciativa di Fundacion Museo Arubano ta sigui riba 1 di oktober e aña aki.
Marca e fecha y no perde! Sigui nos ariba Facebook y asina keda al tanto di locual ta e topico den e siguiente edicion. FMA ta extende un palabra di gradicimento na Sr. Dufi Kock pa su aporte den locual ta trata “Compartimi”. Asina aki comunidad por sigui spera proyectonan inovativo pa inspira nos futuro generacionnan pa sigui siña di nos herencia, cultura, coleccion y identidad.
Fundacion Museo Arubano ta wardabo sin falta den e siguiente edicion di “Compartimi”. Pa mas informacion of pregunta tocante “Compartimi” por tuma contacto cu nos na 584-7090.