Den cuadro di Experience San Nicolas ta cuminsa un proyecto na Community Museum bou nomber di “Compartimi”. Diamars 25 di April a tuma lugar un prome encuentro unda invitado VIP Sr. Dufi Kock conhuntamente cu Sr. Renwick Heronimo y Jfr. Nyohmi van der Biezen a reuni pa cuminsa e proyecto aki.
Compartimi su meta primordial ta pa brinda nos comunidad e oportunidad di bin hunto pa comparti storianan, historia, cultura y asina inspira y educa otro. Den e prome edicion aki nos ta elabora ariba e biografia di Sr. Adolf “Dufi” Kock, un historiado, escritor sigur conoci den nos comunidad. Sr. Renwick Heronimo kende ta curator pa Fundacion Museo Arubano lo ta e moderador di e prome edicion aki. Alabes lo trata historia di San Nicolas den epoca Di Dos Guera Mundial y ki efecto e tabatin pa Aruba en general. E pregunta central di e charla lo ta “San Nicolas por a somenta?”
Community Museum ta situa banda di CMB Branch na San Nicolas. E prome edicion di Compartimi ta tuma lugar ariba diadomingo 4 di juni 2017 cuminsado 10:00am -12:00pm. Pa e evento aki ta necesario pa inscribi. Cupo pa e charla ta limita. Por inscribi por medio di e-mail [email protected] of telefonicamente na 584-7090. Tin un contribucion (AFL10,-) pa e evento aki cu tambe ta inclui entrada pa Museum of Industry. Nos ta ofrece un pasa boca y algo di bebe na participantenan di e charla.
Fundacion Museo Arubano ta invita pueblo completo pa bin comparti cu nos y pasa un rato ameno na Community Museum.