Venezuela ta e di dos mercado turistico di mas grandi di Aruba. Sin e reduccion di e bishitante Venezolano debi na e situacion economico/politico na Venezuela cu a bin ta conduci na cambionan impactante den e mercado durante ultimo añanan, por conclui cu Aruba su turismo a crece duante e prome 10 lunanan. Esaki ta debi na resultadonan mara na mercadonan di Merca y tambe otro mercadonan den Latino America y Europa. Aunke Venezuela e cay, e resultado positivo den e otro mercadonan ta danki na Aruba su strategia pa activa Merca na un manera mas fuerte y entre otro dirigi mas atencion riba cierto mercadonan den Latino America y Europa. Compara cu e prome dies lunanan di 2015, incluyendo Venezuela, por a nota un reduccion di 7.0% di bishitante den su totalidad. Si exclui e mercado fragil Venezolano di e analisis, por mira cu nos turismo a sigui crece cu un 2.1% di bishitante.
Turismo ‘stay-over’: Januari – October 2016
Compara cu e prome dies luna di 2015, turismo procedente for di e continente Norte Americano a subi cu 0.6%. Merca a subi cu 1%, mientras Canada a baha cu 6.3%. E continente Norte Americano a trece un total di 556,205 bishitante cu ta representa un total di 60.0% di turismo durante e prome 10 lunanan di aña. Pa locual ta e continente Latino Americano esaki a conoce un reduccion di 23.5% debi na problemanan economico y politico na Venezuela cu a baha cu 31.4%. Brazil tambe a conoce un reduccion di 38.9% pa mesun motibonan. E impacto di crisis di e mercado Venezolano riba nos turismo Latino Americano a wordo parcialmente absorbi danki na e crecemento di Colombia cu a subi cu 39.4%, sigui pa Argentina cu un crecemento di 24.9%. E continente di Latino America a trece 261,893 bishitante, pues representando 28.3% di nos turismo durante e prome 10 lunanan di aña. Pa loke ta Europa por nota un aumento di 7.8%. Hulanda a subi cu 0.1%, Mientras Reinonan Uni (UK) a aumenta cu 55.7%. E continente Europeo a contribui cu un total di 72,067 bishitante cu ta representa 7.8% di turismo pa Aruba den e prome 10 lunanan di 2016.
Turismo crucero
Pa e prome dies lunanan di 2016, 477,575 pasaheronan crucero a bishita nos isla, cual ta 9.6% mas compara cu e mesun periodo na 2015. Esaki ta encera cu nos haf a yama bonbini na un total di 210 barconan crucero durante prome 10 lunanan di 2016 cual ta 4.2% mas compara cu e mesun temporada na 2015.
E Mercado di Venezuela pa Aruba ta normalisando cu e cantidad grandi ‘adicional’ no biahando y cu patronchi di comportacion unda mas ta keda na hotelnan.
Si exclui e mercado Venezolano, por nota cu den luna di October 2015 a ricibi un total di 68,637 di bishitante, mientras cu na October 2016 a ricibi 67,079, cu ta 2.27% di reduccion di bishitante cu a yega nos isla. Si inclui e mercado Venezolano, den luna di October 2015 a ricibi 109,024 bishitante, mientras cu na october 2016 a ricibi 76,491 di bishitante, cu ta un reduccion di 29.8% den luna di October 2016. Esaki ta debi cu den luna di October e mercado Venezolano a conoce un reduccion di 30,975 bishitante Venezolano. Esaki ta 76.7% menos compara cu luna di October 2015. Motibo di esaki ta e fenomeno di ‘raspacupos’, cu a escala den 2015 y a desaparece na comienso di e aña aki ora cu Gobierno Venezolano a pone un paro na/a limita otorgacion di ‘cupo’ (den dollar Mericano) na biaheronan. A limita (practicamente elimina) acceso na dollar Mericano na e pais pa biahenan pa asina por usa e dollar Mericano escaso cu tin na productonan primario manera cuminda y medicina. Nos turismo a permanece stabil apesar di e crisis economico/politico na Venezuela. Esaki tabata visibel den luna di October, unda cu turismo lo a registra un crecemento si exclui e impacto di Venezuela. Apesar di e reduccion notabel, por bisa cu e mercado di Venezuela ta normalisando y mustrando tendencianan similar na e periodo prome cu e fenomeno di ‘raspacupos’; No obstante e reduccion di bishitante, e mercado Venezolano a registra un aumento den e averahe di estadia, di 3.9 anochi na luna di October 2015 pa 5.1 anochi na luna di october 2016. Compara cu October 2015 acomodacion di e segmento Venezolano na hotelnan ‘high rise’ a aumenta cu un 381.1% durante October 2016. Igualmente e cantidad di estadia di e mercado Venezolano na hotelnan ‘low rise’ compara cu October 2015 a aumenta cu un 669.8% na October 2016. Estadia na ‘otro’ tipo di acomodacionnan di e mesun mercado aki compara cu October 2015 a baha cu 42.4% na October 2016. Esaki ta mustra y respalda e normalisacion di e calidad y cantidad di bishitante Venezolano cu pa decadanan a contribui na nos desaroyo turistico.
Acomodacion
Aruba ta ofrece su bishitantenan un variedad di acomodacion pa aloha. Pa e luna di October 41.0% a keda na un ‘high rise’ hotel, cu ta un reduccion di 6.2%. Pa locual ta hotelnan ‘low rise’ esaki a representa un 9.1% di marketshare, cu ta un aumento di 7.8% compara cu october 2015. Tipo di acomodacion timeshare a ricibi 30.2% di nos bishitantenan, cu ta un aumento di 0.01%. Mientrastanto 19.3% di e total di bishitantenan a hospeda den un acomodacion alternativo (‘other accommodations’), cu ta un reduccion di 67.8% compara cu October 2015. Esaki ta consistente cu e ausencia di e fenomeno ‘raspacupos’ y tambe e normalisasion di e mercado Venezolano.
Economia
Di acuerdo cu Banco Central e asina yama ‘Tourism Receipts’, pa cu e prome 6 lunanan di 2016, a contribui cu US$ 1,522.30 miyon (1.5 biyon) pa cu nos economia cual ta un reduccion minimo di 1% compara cu cu e mes un temporada den 2015.
Hotelnan
Segun Aruba Hotel and Tourism Association pa e luna di October, e ‘Average Daily Rate’ (ADR) a reduci cu 2.4% compara cu 2015. Esaki den cifra ta US$ 181.93 na 2015 compara cu US$ 177.64 pa 2016. E ganashi pa camber, e asina yama REVPAR a aumenta cu 2.3% di US$ 133.00 na 2015 pa US$ 136.01 na 2016. E anochinan ocupa pa camber a aumenta cu 3.5%.