Pa november Aruba mester tin un helicopter den servicio atrobe pa asisti polis cu su trabou. Un peticion pa destaho publico a keda publica den medionan di comunicacion e siman aki, y unda por compronde kico tur e helicopter mester por tin y por haci tambe pa cuerpo policial. E destaho publico lo tuma luga dia 1 di october 2018 y un luna despues cu otorga e trabou, e helicopter mester ta den servicio. Esey ta nifica cu prome cu fin di e aña aki, e helicopter por cuminsa traha.
SPECIFICACION
Specificacion di e helicopter cu gobierno di Aruba (lesa: minister di husticia) ta buscando. Fuera di e aspectonan tecnico comun y normal, e helicopter mester por tin e capacidad di por transporta un persona drumi riba brancard. Tambe interesante ta cu e helicopter mester ta ekipa cu e asina yama ‘FLIR Imaging System’. Esey ta un instrumento cu por localisa hende of bestia, no obstante si nan ta dera bou di algo. E ta gara e persona pa medio di e cayente di e curpa (e señal cu e ta manda) pues asina e ta localisa e persona aunke no tin luz, den scuridad of otro problema cu por obstaculisa e vision di e helicopter of persona(nan) den helicopter. E ta algo hopi uza den marina y guera, ora cu e visibilidad ta hopi malo. Extra luz (potente) tambe ta loke e helicopter lo ta ekipa cun’e. Fuera di esey e tin e instrumentonan basta ‘normal’ awendia manera GPS, IFR y tin asiento pa por lo menos 3 pasahero (Fuera di e capitan).
TRABOU DI HELICOPTER
E trabou di e helicopter, segun e datonan di e destaho, ta cu e mester opera bou di auspicia di cuerpo policial, ‘den cuadro di combatimento di crimen , mantencion di orden publico, y trabou di deteccion di hende of cosnan. Fuera di trabou di polis, e helicopter por wordo usa tambe pa transporta herido (severo) cu ta ubica den luganan dificil pa yega, y pa buskeda di hende riba tera y lama, den forma di ‘search & rescue’.