CEO di Aruba Airport Authority N.V. (AAA) Mr. James Fazio hunto cu e Management Team di AAA tawata tin e honor di duna bon bini na Su Excelencia Gobernador di Aruba Sr. Alfonso Boekhoudt na Aeropuerto pa un presentacion y un recorido di e ultimo projectonan y reciente desaroyonan.
Gobernador Boekhoudt a ricibi un resumen di e projectonan reciente y tambe esnan di futuro. Tambe Gobernador a haya un un bista riba e retonan diario cu miembronan di autoridad gubernamental cu ta opera na Aeropuerto ta enfrenta, y con nan tin planea pa adapta y trece cambionan den futuro. Gobernador Boekhoudt a ricibi un caluroso bonbini di un y tur y a haya splicacion breve tocante nan contribucion na e sistema operacional di tur dia na Aeropuerto.
Gobernador Boekhoudt a keda impresiona cu e trabao den ekipo cu a keda demostra na nos Aeropuerto entre tur e diferente departamentonan cu ta traha hunto, pa asina garantisa un prome y ultimo impresion apropia di nos bishitantenan. E projecto recientemente completa “Airport Arrival Enhancement Project” pa embeyese e sala di yegada na Aeropuerto ta un bon ehempel di un excelente trabao den ekipo y cooperacion, cu Gobernador Boekhoudt ta desea di mira den tur e futuro projectonan na Aeropuerto.
Staff y personal di Aeropuerto a keda encanta di por a fungi como anfitrion pa Su Excelencia Gobernador pa asina dun’e tur informacion di e reciente y futuro desaroyonan di Aeropuerto. Gobernador a mustra hopi interes, den sa con tur e departamentonan di autoridad ta traha hunto, uzando lo ultimo den tecnologia na nos disposicion. ‘Ya nos ta entusiasma pa e proximo bishita di Su Excelencia Mr. Alfonso Boekhoudt, como cu el a expresa di tin interes pa ricibi mas informacion riba aspectonan specifico di Aeropuerto,’ asina CEO di AAA Sr. James Fazio a remarka.