Sr. Marlon Sneek, lider di Fraccion di AVP den parlamento a elabora ariba e prome aña di gobernacion di e coalicion aki, unda cu e ta bisa cu e gobierno actual tin mas medida den e prome aña di gobernacion cu tempo di AVP. E ta splica.
Locual cu e pueblo por a mira ta medida y saliendo for di e punto di bista di Parlamento, niun ley cu a yega parlamento no ta na beneficio di comunidad. Esaki ta un gobierno hopi slow, sin vision, sin sa concretamente kico nan kier logra y pa mira esaki hinca den ley. Loke por evalua ta un presupuesto, tin un supletorio ta na caminda. Y e presupuesto, manera cu fraccion di AVP a mira nan no por vota pa un presupuesto unda cu gobierno ta saca placa for di placa di pueblo, pa asina e hiba su maneho y gasta placa den e caso aki. Manera cu AVP a bisa, por mira esaki den e conseho di CAft, algun siman atras, riba loke ta e presupuesto supletorio, unda cu e ta splica cu e deficit presupuestario ta mas halto cu loke ta e realisacion di 2017. E ta mustra cu e gastonan ta mas halto den e presupuesto 2018, den e supletorio compara cu 2017. Cu e gastonan total di e presupuesto a subi cu 97.8 miyon. Esey kiermen cu gobierno a hisa su gastonan cu 100 miyon florin.
Ora cu presupuesto 2019 a bin cu aumento di BAZV cu mester a trece cu gobierno no mester duna AZV un eigen bijdrage di 30 miyon mas. Pero gobierno a gasta e placa ey tambe. E redoblacion di BBO, awe e 130 miyon gobierno a gast’e, cu mester tabata pa paga gastonan. E seriedad, segun Sr. Sneek, no ta refleha. E conseho di CAFt tambe ta papia di aumento di 10 miyon florin mas na personal, y loke gobierno a bisa di lo haci, no por wak esaki refleha den e maneho.
A papia di crisis social, a pone 17 miyon pa e crisis social. Pero despues di 1 aña ainda nada. Unico cos ta cu a traha un logo. A pidi parlamento pa traha un fondo apart pa hinca e 17 miyon florin den dje. Pero nada concreto. E unico cos cu a sali cu nan kier haci ta e parti di e crisis social, pero ni esey no a wordo haci. Ta hopi tristo pa mira cu un aña a pasa bay sin cu tabata tin adelantonan concreto cu pueblo por a pone man y disfruta di nan.
Sr. Sneek a sigui bisa cu nan a pidi como 13 reunion cu nan a pidi pa atende cierto puntonan pero e puntonan aki no ta wordo tuma na cuenta. Y no tin contesta e pakico e reunionnan aki no ta wordo yama. Fraccion di AVP a manda pidi cierto documentonan pa duna nan aporte y awe loke nan por traha cun’e, ta puramente consehonan di Raad van Advies, cu ta confirma cu e gastonan a subi. E conclusion di presupuesto 2019, pagina 14 di Raad van Advies: “Geconcludeerd kan worden dat het Land op grond van het ondergave ontwerp het tekort van 2019 zal terugdringen tegen opzichte van tekort van vorig jaar, dit lagere tekort is voornamelijk het gevolg van verhoging van belasting”. Dus, no tabata tin un maneho financiero pa baha gasto. Pero door cu e bin cu mas belasting, mas medida, ta haya 130 miyon pa cual por mira un cambio. P’esey pa otro aña mester bin cu mas medida, ya cu no tin un maneho economico. Aruba ta den un recess.
No por bisa cu nan a haya supuesto sorpresanan. Pero nan a sinta 8 aña den oposicion y no a prepara nan mes pa goberna. Presupuesto a crece cu 130 miyon, y e 130 miyon no tabata pa pueblo. A saca e placa aki for di saco di pueblo, 2018 CAft a exigi pa baha 12 miyon for di e presupuesto y por mira den 2019 por bisa cu e presupuesto a bolbe subi cu 10 miyon. Esey ta e unico maneho cu tin, friends & family, zorg pa duna famia y amigonan trabao. Pero nan no tin un manerho cu ta yega di berdad cerca e comunidad. Y esey ta e puntonan cu AVP a adresa ora cu a atende presupuesto 2018.
Y si mira e protocol cu a wordo firma ultimo. No ta relevante pa discuti ariba 2019, ya cu Caft ta bisando cu loke bin extra lo mester wordo uza pa paga debe. Y Caft mester aproba e maneho di gobierno, prome cu tuma un decision. Te asina leu, Sr. Marlon Sneek, lider di fraccion di AVP den parlamento.