WASHINGTON D.C., Merca – Departamento di Siguridad Nacional ta seleccionando y aislando cierto avionnan pa haci pruebanan adicional di siguridad ora cu nan yega Merca, como parti di un medida complementario na e prohibicion di aparatonan electronico cu e Gobierno di e pais aki a anuncia na fin di luna pasa.
E procedimento adicional di siguridad ta sosode tras di cortina y no a wordo informa publicamente pa e Departamento di Siguridad Nacional ora cu a anuncia e prohibicion di aparatonan electronico den cabina pa cierto vuelonan internacional.
Un fuente cu conocimento di e procedumentonan aki a bisa CNN cu e Administracion di Siguridad den e Transporte ta seleccionando vuelonan cu ta yega for di e mesun paisnan di Medio Oriente y di nort di Africa, incluyendo den e prohibicion y revisando nan cu ayudo di cacho y ekiponan antiexplosivo. Den algun caso, ta sosode incluso prome cu e avion para na e porta di embarke. E foco di e medida adicional ta e ekipahe factura den e bodega di e avion.
Prome cu e medidanan nobo di siguridad wordo implimenta, e pasaheronan por retira nan maleta inmediatamente despues di baha for di e avion. Si nan tabata na nan destino final, nan por sali for di e aeropuerto cu nan maleta den man. Si tabata un vuelo di conexion, nan por pasa via douane y nan ekipahe lo wordo gescan di nobo prome cu tuma e siguiente vuelo.
Cu e procedimentonan nobo, tur ekipahe ta wordo revisa prome cu e pasahero bolbe bay cun’e.
“Con y unda e procedimentonan aki ta tuma luga, ta varia di acuerdo cu e capacidadnan di e aeropuerto,” David Lapan, vocero di Homeland Security a bisa CNN.
E aumento di e revisionnan ta sosode den 14 aeropuerto di Merca. Departamento di Siguridad Nacional a confirma cu e aeropuertonan domestico afecta cu e medida aki ta: Atlanta (ATL), Boston (BOS), O’Hare di Chicago (ORD), Dallas/Fort Worth di Texas (DFW), Fort Lauderldale (FLL), Intercontinental di Houston (IAH), Los Angeles (LAX), Miami (MIA), Orlando (MCO), JFK di New York (JFK), Philadelphia (PHIL), San Francisco (SFO), Seattle-Tacoma (SEA) y Washington Dulles (IAD).
E vuelonan cu a cuminsa wordo selecciona pa revisionnan adicional di siguridad ta bin di e 10 aeropuertonan ubica den e ocho paisnan di mayoria musulman, inclui den e prohibicion di e Gobierno di Merca: Egipto, Jordania, Kuwait, Morroco, Qatar, Turkia, Arabia Saudita y Emiratonan Arabe Uni.
Falta di Confianza?
“E restriccionnan no ta un refleho di confianza – of falta di dje – den e aerolinea y aeropuertonan involucra, sino un reaccion na e ambiente di menasa y nos evaluacion di e riesgonan,” Lapan a añadi.
Vocero di e Departamento di Siguridad Nacional a bisa na e reporteronan diamars cu tabata hopi pronto pa sa si algun di e aeropuertonan cu ta actualmente riba lista por yega na sali for di e lista na mehora nan posturanan di siguridad. Lapan a agrega cu e politica lo wordo revisa constantemente pasobra e ta basa riba un entorno menasador.
“Asina ta cu, mientras nos ta sigui evalua e entorno menasador rond di e biahenan aereo, nos por tuma otro decisionnan na expande of retira algun medida,” Lapan a bisa. “Pero no tin nada cu nos por bisa riba un aeropuerto en particular. Nos no ta den posicion di bisa “aki ta e cosnan cu mester pa sali riba e lista.”
E fuente cu conocemento di e procedimentonan di TSA a bisa CNN cu e institucion aki no kier cu e ekipahe sali for di e bodega sin un di dos revision.
“TSA no ta riba e tereno pa revisa e ekipahe den e aeropuertonan (di medio Oriente y di Nort di Africa)”, e fuente a bisa. “Si un pasahero accede na un vuelo di conexion for di e sistema domestico of yega na un aeropuerto cu ekipahe, TSA kier sigura cu e maletanan aki ta sigur.”
Lapan a bisa na reporteronan cu e prohibicionnan pa cierto dispositivonan electronico a bordo di e cabina riba vuelonan directo pa Merca di dies aeropuertonan specifico di Africa y Medio Oriente, “posiblemente” por expande.
E expansion por inclui mas aeropuerto y dispositivo. Sin embargo, el a alerta, ningun di e medidanan aki ta inminente.
Fuente: CNN en Español