En conexion cu dia di Himno y Bandera directiva di Centro di Bario Playa Pabao a organisa un actividad cultural riba 18 di Maart. E actividad a cuminsa pa 12’or di merdia y a termina anochi pa 8’or. Riba e programa tabatin entre otro tipico Pali-sia, Chaz Dancers, Kids 2 Kids Dancers, Baile di sinta bou di direccion di sra Lia Lopez y hopi mas. Tambe tabatin presentacion di Jonathan Croes y diferente ganado di Festival na nos Himno y Bandera. Mester menciona cu durante di e actividad a haci entrega di e premio Cultural Playa Pabao na sr Chucho Hoek. E programa tabata hopi varia cu canto y baile di nos artistanan. Directiva di Centro di Bario Playa Pabao ta gradici Cede Aruba, Prins Bernhard Cultuurfonds y Gobierno di Aruba pa nan sosten financiero.