Aña pasa a cuminsa un programa na Dr. Horacio E. Oduber Hospitaal hunto cu Vrije Universiteit Medisch Centrum Amstel Academie pa drecha e calidad di enfermeria na hospital. E programa, cu un duracion di un aña, tabata sumamente exitoso; esunnan envolvi cu e proyecto di parti di e VU MC a laga sa cu esaki ta debi na e entusiasmo di e personal pa cu e trayecto y oportunidadnan pa sigui desaroya den nan profesion y carera y na nan conocemento previo cual a forma un bon base pa e sistema nobo cu a keda introduci.
E punto di salida tabata cu tur profesional cu ta traha den enfermeria mester por eherce tur e criterionan cu ta wordo exigi pa ofrece un bon servicio y cuido na e pashentnan. Na final di un aña di trabao intensivo, mas di 60 nurse a completa e proceso cu exito. Ademas a logra pa forma 26 instructor y 16 persona cu ta percura pa evaluacion di e procesonan basa riba protocolnan di hospital pa asina sigura e sostenibilidad y continuidad di e sistema renoba pa y den hospital mes.
E programa a consisti di tres parti: e-learning, teoria, y practica den un “skills lab”, unda cu nan a train locual cu nan a siña riba popchinan special. Despues di completa e programa e nurse mester a mustra y demostra riba nan piso cu nan ta eherce e procesonan aki manera nan ta prescribi. E proyecto a inclui tur persona cu ta traha den y pa hospital, incluyendo tur e dokternan specialista den servicio di hospital, pero tambe a conta cu sosten di otro instancianan cu ta trata cu pashentnan. E proyecto a cubri tur factor y faceta di trabao, cuminsando cu e”update” di e base, esta e protocolnan.
Monique Leerdam, kende tabata lider di e proyecto di parti di hospital, a bisa cu e programa crea pa percura pa e nursenan ta “up to date” cu e procesonan cu nan ta haci tur dia, a wordo organisa tambe mirando cu AruBIG ta un ley y lo bin na vigor pronto. E ta hopi importante pa e calidad di cuido cu ta brinda na pashentnan keda riba un nivel halto, el a añadi.
E “skills lab”, por ehempel, ta un area cu no tabata existi antes, pero tabata necesario pa ofrece nursenan oportunidad pa train riba “levensechte poppen”. Despues di train riba e popchinan e nurse ta haci loke nan a siña “riba piso” bao di guia di nan “begeleider”, kende na su turno ta percura pa e nurse haci e “handeling” bon y asina ta yuda sigura cu e calidad di cuido en general ta keda riba un nivel halto. Un otro elemento cu a keda introduci cu e programa ta e “leermanagementsysteem”, unda e tur empleado di hospital cu ta haciendo un opleiding ta wordo registra; esaki ta un instrumento di sosten den e empleado su crecemento den e area di habilidad y capacidadnan personal, Leerdam a splica.
E lider di proyecto di parti di VU MV Amstel Academie tabata Marlies Bakker, kende ta un “opleider” na e institucion Hulandes. El a splica cu esaki tabata un proyecto grandi cu a inclui shete departamento di hospital y evaluacionnan extenso. E preparacion a inclui evaluacion di e sistema di e-learning, cual ta algo nobo, pero a bay asina bon cu no mester a haci ningun cambio na dje prome cu a implement’e.
E programa a cubri entre otro procedimentonan restringi, procedimentonan cu risico halto y rasonamento critico. A subraya e importancia di “toetsing”, pues unda cu test loke e persona a siña, y a indica cu esaki ta esencial pa yega na e resultado final satisfactorio. Finalisando a bisa cu e programa ta uno completo, unda cu a pone riba papel factornan importante manera kico mester tuma luga si un persona no a “haal” su testnan, etc. y factornan como asuntonan di personal, maneho y e sistema di leermanagement a keda introduci.