Armando Goegedrag tambe a yega awor na e Deposito di Umatilla na Oregon y a uni cu co-boluntario di ABC, Ainhoa Gogorza, pa un training formal cu certificacion pa e Shoco Norte Americano, e asina yama “Western Burrowing Owls”.
Aruba Birdlife Conservation (ABC) ta trahando huntu cu “Global Owl Project” riba un proyecto di conservacion nacional pa nos shoconan. E director di e “Global Owl Project” sr. David Johnson”, ta train nos boluntarionan personalmente y ta keda den contacto diario cu ABC na Aruba.
ABC su intencion ta pa ubica 500 neishi artificial na diferente parti rond Aruba durante e añanan cu ta bin. Un di e peligronan mas grandi pa e shoco di Aruba ta nan lugarnan di pone neishi cu ta desapareciendo, entre otro pa motibo di demasiado construccion, no planificacion y falta di regulacion di e dimas di turismo relaciona cu actividadnan recreacional “off-road”.
E expertonan di “Global Owl Project” ya e duna dos workshops na Aruba y e tercer workshop na Aruba ta planea pa final di 2019.
Tin indicacion awor, basa riba observacion di conducta y vocalisacion di nos shoco di Aruba, “Athene cunicularia arubensis, ta un especie nobo di shoco. Analysis di DNA, vocalisacion, morfologia y distribucion ta e 4 variabel cu lo yuda pa determina si en berdad e shoco di Aruba ta un especie nobo. Mas a lew ta wordo estima cu e shoco tabata na Aruba pa mas di un miyon y mei di aña, hopi mas prome cu e ser humano a pone pia riba nos isla.
Aruba ta e unico pais den Reino Hulandes cu tin e shoco.
Banda di e projecto di conservacion di e shoco di Aruba, Aruba Birdlife Conservation ta desaroyando un programa di conservacion di nos Prikichi tambe, di cual den futuro cercano, mas informacion lo ta disponibel.
E cantidad di nos prikichinan, “Aratinga pertinax arubensis” (e nomber cientifico tradicional) a baha drasticamente. Similar na e programa di conservacion di e shoco di Aruba, e programa di conservacion di prikichi lo ensera tambe ponemento di un gran cantidad di neishi artificial na diferente lugar rond di nos isla.
Na 2012 a declara e shoco como e simbolo nacional di Aruba y e prikichi na 2017 como e parha nacional di Aruba. Di e 270 especienan di parha registra na Aruba, e shoco y e prikichi ta e unico dos especienan endemico di Aruba.
ABC ta orguyoso di su team di voluntario y e trabao cu nan a bin ta desplega den un esfuerzo pa rescata e especienan aki di extinccion. E asociacion cu e proyecto “Global Owl Project” ta extremadamente importante y ABC ta hopi contento cu e asociacion y e sosten, guia y training cu nos boluntarionan ta ricibiendo personalmento di sr. David Johnson, Director di Global Owl Project.
E programa di conservacion di “Umatilla Depot Burrowing Owl” cu Global Owl Project a desaroya y implementa ta un storia exitoso. Na momento cu a pidi ayudo di Global Owl Project, tabatin solamente tres neishi di shoco cu a sobra na e deposito na Umatilla. E cantidad cu a conta aña anterior a revela cu na e momento di conteo tabatin mas cu 70 neishi di Shoco activo na e lugar. Esey kier men cu e strategia ta funciona y cu e neishinan artificial ta wordo usa exitosamente dor di e shoco. E Proyecto di conservacion di shoco di Aruba tin e obhetivo di obtene resultadonan similar.
Riba e potret, boluntarionan di Aruba Birdlife Conservation Ainhoa Gogorza (na man robes) y Armando Goedgedrag (na man drechi). Meimei di nan dos, nan coach personal, sr. David Johnson, director di Global Owl Project. Potret ta saca na e “Burrowing Owl conservation project”, na Umatilla, Oregon, Estados Unidos.