Profesor Han Lindeboom di Universidad di Wageningen na Hulanda lo duna un presentacion riba 11 di October riba Delta Plan, un plan sumamente importante pa preserva nos coral y asina preveni cu nos economia lo sufri severamente si nos no cambia nos maneho awo.
E charla ta organisa pa Koninklijk Instituut Van Ingenieurs (KIVI), un instituto di ingeniero cu tambe tin miembronan na Aruba. Sinembargo publico en general ta invita pa bin scucha di e Delta Plan cu no ta toca solamente Aruba pero full Caribe Hulandes.
Coral ta sumamente importante pa e islanan Caribense den Reino. Nan ta percura pa nos lama ta keda limpi; nan ta proteha nos costanan y nan ta un fuente di alimentacion. Investigacion cientifico ta mustra cu nos coral ta den un estado masha precario. Esaki no ta solamente un desaster ecologico sinembargo tambe desastroso pa nos economia cu ta depende di turismo.
Coral ta un atraccion turistico pero manera menciona nan tambe ta percura cu nos lama ta keda bunita y dushi pa landa. Sin coral e calidad di nos lama ta bay atras cu hasta crea un situacion cu no por landa den dje mas. Sin coral nos famoso beachnan di santo blanco ta bay perdi. Y netamente esaki ta atrae nos turistanan: beachnan blanco y awa blauw. Pues sin coral, ayo mayoria parti di nos turismo. Sin coral tambe: ayo mangelnan, pisca, parha y hopi mas.
E Delta Plan kier preveni esaki y inicia accion. Tin basta proyectonan andando caba riba e tereno aki den region di parti di instancianan gubernamental y NGO nan. Sinembargo e iniciativanan aki ta fragmenta, isola y asina no ta yega na e meta final esta pa preserva y restaura coralnan.
E Delta Plan awor ta den desaroyo bou guia di profesor Lindeboom. Pa e plan aki bira exitoso mester di sosten di Reino completo. Problemanan cu mester wordo atendi entre otro ta erosion, piscamento, desaroyo robes di nos costanan, contaminacion, mehora sistema pa procesa awa, restaura populacion di pisca, etc.
E plan por nifica hasta hopi mas y riba termino largo por desaroya den un plan mas amplio pa garantisa un futuro sostenibel di e islanan Caribense Hulandes. Pa asina salvaguardia y mehora nos economianan, baha pobresa y duna e habitantenan e mesun nivel di siguridad cu esunnan tin, bibando na Europa.
Den su presentacion profesor Lindeboom tambe ta habri pa discusion, comentario y sugerencia for di publico. E charla lo tuma luga riba diaranson 11 di October for di 6.30 pm na MFA Noord.