Otmar Oduber durante oficialisacion di e plataforma politico POR a bisa claramente cu creacion di un instituto cientifico y existencia di e organisacion di hobennan profesional ta dos aspecto importante ancra den e statutonan di E Forsa Nobo.
El a bisa cu e instituto cientifico lo consisti di young professionals y expertonan riba diferente tereno cu lo mester percura pa un base cientifico pa e programa y decisionnan di maneho publico di POR. E organisacion di hobennan profesional lo tin como meta principal pa promove futuro ehecutivonan pa e partido y pa comunidad Arubano pa medio di un formacion politico general, unda cu nan lo por reemplasa den futuro e actual ehecutivonan. Cu e organisacion aki y e instituto cientifico POR ta sigura e fluho continuo di sanger nobo y ideanan nobo den tanto e plataforma como den politica y gobernacion.
Igualmente Otmar den un forma hopi emotivo a bisa “Awe ta un dia historico. Nos ta celebra nacemento di un plataforma politico nobo, E Forza Nobo pa un Aruba nobo. Un Aruba unda e hende y su derechonan, su felicidad, su progreso y su prosperidad ta poni central. Un Aruba cu no conoce ningun tipo di discriminacion. Un Aruba unda e ciudadano ta conciente, critico y participativo. Un Aruba cu un Parlamento cu ta cumpli debidamente cu su tarea di controla gobierno. Un Aruba cu un gobierno transparente, cu bon gobernacion y cu un aparato gubernamental productivo y eficiente. Un Aruba unda nos yiunan di tera cu a bay studia den exterior ta bolbe nos pais pa asina nan tambe por contribui na desaroyo di nos dushi pidi baranca. Un Aruba unda e ciudadano por biba trankil, sin temor di bira victima di criminalidad. Un Aruba unda e pueblo por conta cu un nivel halto di calidad y servicio di nos sistema di salud publico. Un Aruba cu ta mira e importancia y ta duna contenido real na proteccion di nos naturalesa y medio ambiente. Un Aruba harmonioso, sin problemanan social. Un Aruba cu no ta wordo confronta continuamente cu metemento di parti di Gobierno di Reino den nos asuntonan interno, sino mas bien nos lo mester por papia di cooperacion den e mesun Reino ey. Cu otro palabra: un Aruba nobo, di cual nos tur por ta orguyoso di dje y unda nos pueblo realmente ta wordo respeta”.
Concluyendo Otmar Oduber a bisa cu vision, meta y idealnan di POR ta hopi cla. E ta conciente cu nan lo wordo confronta cu intimidacion y resistencia di parti di e partidonan tradicional, cu no ta interesa den e cambionan fundamental cu nan ta propone, pasobra nan unico interes ta pa mantene e status quo cu nos isla conoce ya pa trinta aña caba y cu definitivamente no a sirbi e bienestar general di nos pueblo. “Mi ta ripiti, e no ta bay ta facil pasobra ningun lucha ta facil, pero cu fe y perseverancia nos ta bay logra. Nos POR, Aruba POR, E Forsa nobo pa un Aruba nobo”.