Sr. Shanon Croes, hefe di operacion na Dump, ta elabora rib’e planes pa recicla lo mas cu nan por riba tereno di Dump.
Sr. Croes ta splica cu nan ta haciendo e proceso di reciclahe riba nan tereno y pa tur loke por uza of re-uza, esaki ta posibel pa evita cu acumula mas rib’e tereno. Sin embargo, e proceso aki no ta funciona pa cu e monton di sushi cu tin acumula caba den un cero. Tin diferente gasnan cu ta profundo hinca den e tereno y esaki ta rekeri di un otro metodo pa trat’e. Tambe tin hopi sushi cu a yega di wordo deposita den e tereno aki cu no ta sigur kico tur tin hinca profundamente den dj’e. Te hasta a yega di papia di posibel desperdicio radioactivo. E proceso pa bay coba henter e tereno ta basta trabou y no lo tuma lugar pa awo.
Por ultimo, Sr. Croes a sigui splica cu e tereno di Dump a yega su limite hopi aña caba y loke nan ta manehando ta hopi trabou. E ta sinti cu ta responsabilidad di henter comunidad pa cumpra y uza menos materialnan cu nan lo bay tira afo.