PHILIPSBURG, St. Maarten- E bario di St. Peters diadomingo mainta a wordo sacudi pa un noticia tragico di un baby di 2 aña, cual dialuna lo mester a celebra su di 3 cumpleaños. E incidente a tuma luga rond di 10 or y 30 di diadomingo mainta.
Tur cos ta mustra cu ta trata di un grupo di hoben cu a conduci na un situacion unda cu’n grupo a purba di dal un di e hobennan di e otro grupo cu auto.
Un di e hobennan a logra scapa, di baina, door di bula over di un muraya, rascando su curpa y ta sufri fractura na su pia.
Den e cayente di e atake, e criatura di apenas dos aña, cu tabata hungando cu su truck na e otro banda di caminda, ta wordo alcansa pa e auto. E mucha a fayece al instante, door cu segun testigonan, el a sufri fractura na su nek.
E hobennan en cuestion, incluyendo e chauffeur a wordo mira ta core bay, cu bate di beisbol den man.
Segun un otro testigo, ora cu e auto a hera e prome hoben, el a wordo mira ta reverse y ta speed bay padilanti. Esaki ta momento, cu segun testigonan, lo tabata yiu di un di e hobennan envolvi. E mama di e mucha lo tabata trahando na momento di e sucedido.
E prome oficialnan di polis cu a yega na e sitio, a bira emocional na e sitio, ora cu el a wak e curpa di e criatura. Un polis femenino a bira malo na e sitio y mester a wordo hiba for di e sitio.
Al menos tres ambulance tabata presente na e sitio pa atende dos di e hobennan y polsinan tabata en espera di auto mortuario pa bin busca curpa di e criatura.
Investigacionnan ta continua den e caso lamentable aki.