Pa loke ta trata Watty Vos Boulevard, DOW tin diferente contratista ta trahando na diferente caminda. Director di DOW, Sr. Marlon Croes ta amplia mas ariba esaki.
El a cuminsa for di rotonde FCCA pa rotonde di Codemsa y aki tin un retraso pa motibo di e awasero. A bin ripara cu e plan di drenahe no ta esun di mas miho. Nan a contrata un consultant Hulandes, pa haci tur e simulacionnan necesario, pa garantisa cu ora awa yobe, e drenahe ta traha bon pa e caminda no ta yena cu awa. Esey ta e informacion cu nan ta wardando yega for di Hulanda, pa nan por adapta e plan y asina caba cu e trabao.
Ademas nan a asfalta entre Seroe Patrishi cu Tanki Leendert y nan a asfalta parcialmente entre Tanki Leendert cu Ponton. Tambe e contratista ta habriendo e fundeshi for di Ponton pa e caya Schotlandstraat cu ta cerca di Ling & Sons. Pronto ora cu nan caba cu esey nan lo asfalta esaki tambe.
Mas aleu, Ing. Marlon Croes a sigui bisa cu asina cu e trabaonan caba na e rotonde di Hospital, nan lo move pa e lusnan di trafico na Superfood, cual tambe lo bira un rotonde, pa asina yuda e fluho di trafico y haci’e mas save pa e peaton tambe. Na Caya Ernesto Petronia for di rotonde Ponton pa Citgo Ponton, cu trabaonan ta tumando luga ariba e caya aki. E contratista tin diferente trabao ta hacienda pa asina gana tempo y purba di obstaculisa e trafico lo menos posibel. Awo ta e punto di Codemsa y e punto di Hospital cu ta esun cu ta influenciando e trafico basta hopi.
Pero e contratista ta caba unda tin menos influencia di trafico y un pa un lo bay haci e cambionan den e rotondenan. Un otro reto grandi pa otro aña ta pa traha e viaductonan, cual lo wordo traha un na Hato y un na Meiveld, y traha e duikernan patras di San Barbola.